Адвакат: Пакаранне Бяляўскаму - вельмі жорсткае і неадэкватнае

Патрыёт абскарджвае прысуд суду.

Абаронца патрыёта Андрэя Бяляўскага адвакат Вадзім Мушынскі падтрымлівае меркаванне свайго падабароннага пра неабходнасць абскардзіць прысуд, які вынесла суддзя Марына Запаснік, паведамляе «Радыё Свабода».

Вадзім Мушынскі мяркуе, што пакаранне, якое прызначанае Бяляўскаму судом, вельмі жорсткае і неадэкватнае яго ўчынку.

«Правільна, што Андрэй мае намер абскардзіць прысуд, мы пададзім на яго апеляцыйную скаргу. Год абмежавання волі за адзін патрон, пры прызнанні віны і пры раскаянні, пры ўсіх абставінах, якія сталі аднаўляць віну, - гэта занадта».

Вадзім Мушынскі ў спрэчках з пракурорам прасіў суд абмежавацца для Бяляўскага грашовым штрафам. Адвакат мяркуе, што такая магчымасць была, але чаму яе не выкарыстоўвала суддзя, каментаваць не бярэцца. Можна параўнаць справу Андрэя Бяляўскага са справай грамадзяніна Францыі, якога ў снежні суд у Гомелі вызваліў ад адказнасці за правоз такога ж баявога патрона?

«Вядома, той апраўдальны прысуд напрошваецца як прыклад, што справу можна вырашыць і так, але, дакладна не ведаючы абставін, устрымаюся ад аналогій. Там яшчэ было тое, што француз сам выдаў той патрон, гэта спрацавала, у тым ліку ўлічылі, што ён грамадзянін іншай краіны. А тут іншыя абставіны. Але ў любым выпадку - усяго адзін патрон, няма намеру на злачынства, няма зброі - караць абмежаваннем волі за гэта відавочна зашмат», - мяркуе адвакат Вадзім Мушынскі.