Сіноптыкі апавялі, калі выпадзе снег
12- 12.01.2018, 18:21
- 82,196
Белгідрамет нарэшце досыць вызначана назваў дзень, калі павінен выпасці снег.
Зіма, спрабуючы быць сабой, пакуль абмяжоўваецца паўмерамі ў выглядзе недарэчнага марозу над голымі палямі і лясамі. Між тым Белгідрамет, які вельмі асцярожны ў прагнозах, нарэшце досыць вызначана назваў дзень, калі павінен выпасці снег. Таўшчыню покрыва прадказваць пакуль рана, але ёсць надзея, што снегу будзе дастаткова для лыжных вандровак, піша onliner.by.
У гэтыя выходныя і ў пачатку будучага тыдня чакаецца марознае надвор'е без істотных ападкаў – да мінус 15 уначы і ад 0 да мінус 8 удзень.
У гэтай сітуацыі студзеньская паводка ўвогуле разгубілася і не ведае, як быць: ці то адыходзіць, ці то замярзаць, як ёсць, на палях ды ў гародах. Назіральнікі, якія ў папярэднія тыдні дакладвалі пра рост узроўняў, цяпер паведамляюць, што вада пайшла на спад. Многія ставы ўжо пакрыліся тонкім і небяспечным лёдам.
Паводле разлікаў Рэспубліканскага гідраметэацэнтра, у сераду, 17 студзеня, па ўсёй краіне можа пачацца снегапад. Суправаджацца гэта, як чакаецца, будзе парывістым ветрам і завеяй. У той самы час маразы троху паслабнуць. Удзень чакаецца тэмпература ад 0 да мінус 5 градусаў.