«Мяса не кожны дзень. Бяром таннейшае, на костцы»

Сям'я распавяла, як жыве на 1 000 рублёў на чацвярых.

Чытач tut.by падзяліўся гісторыяй выжывання.

«Хачу напісаць, як мы жывем сваёй сям'ёй на 1 000 рублёў у Гародні. Мая сям'я - гэта жонка і двое дзяцей. Жонка знаходзіцца ў дэкрэтным адпачынку, я працую. Атрымліваю 580-590 рублёў на рукі. Жонка 417 рублёў. Жыллё сваё - дапамаглі набыць бацькі», - піша Віктар.

АСНОЎНЫЯ ВЫДАТКІ:

Камунальныя аплаты: 80 рублёў. Рахунак блізу 30 рублёў, усё астатняе паводле лічыльнікаў.

Дзіцячы садок: блізу 60 рублёў харчаванне + 30 рублёў два гурткі. Дзіця любіць наведваць дзіцячы садок, гуляць з дзецьмі, займацца. Многія раілі не вадзіць, бо малодшы дома, але вельмі складана арганізаваць паўнавартаснае развіццё дваім дзецям рознага ўзросту. Малодшы проста не дае займацца са старэйшым, будзяць адзін аднаго. Таму нават не разглядалі варыянт, не вадзіць дзіця ў дзіцячы садок. (Сад насупраць дома).

Паліва: 40 рублёў. Ездзім у справах і да бацькоў часам у вёску.

Лекі: 40 рублёў. Адно дзіця знаходзіцца на сталым лячэнні. Калі хварэе яшчэ хто-небудзь з сямейнікаў, сума павялічваецца.

Інтэрнэт: 17 рублёў.

Тэлефоны: 24 рублі. Мой - 9 і жонкі - 15.

Усяго асноўныя выдаткі складаюць 281 рубель.

ХАРЧАВАННЕ

Жонка вельмі адказна ставіцца да кармлення дзяцей. Вылічвае ўсё паводле нормаў і корміць паводле графіку. Атрымліваецца малодшае дзіця прыкладна праядае асноўнай ежы на 70 рублёў, не лічачы кандытарскіх вырабаў, хлебу, сокаў. На садавіну і гародніну не пазначаная сума, бо шмат даюць бацькі з вёскі і на кожную садавіну, ягаду, гародніну вялікая розніца ў кошце.

Старэйшае дзіця сілкуецца ў дзіцячым садку, але з раніцы заўсёды снедае, дома есць вячэру і ўсякія прысмакі.

Атрымліваецца 93.5 рублі. Плюс прысмакі, сокі, хлеб. Бывала такое, што дзіця ў дзіцячы садок не хадзіла месяц. Гэта летам і падчас хваробы.

Дзецям бяром добрую нятлустую свініну (12 р за кг), ялавічыну, зрэдку курыцу. Тварог - звычайны ў мяшэчках, альбо дзіцячы з рознымі смакамі ў слоічках. Ёгурты, смятану таксама купляем. Рыбу жонка бярэ розную. На натуральнае малако ў дваіх алергія, не купляем.

Крупы купляем спачатку месяца, на што выдаткоўваем рублёў 8-10.

Сабе на прадукты выдаткоўваем яшчэ рублёў 200 на дваіх. Жонка есць мала, мяса не кожны дзень. На садавіне не эканомім. Для сябе мяса бяром таннейшае, на костцы, курыцу. Рыбу самі ямо раз на тыдзень. Малочныя прадукты таксама купляем.

СРОДКІ АСАБІСТАЙ ГІГІЕНЫ:

Прыкладна рублёў 50 на месяц ідзе на розныя слоічкі для жонкі і іншыя патрэбныя сродкі. Жонка для скуры твару і валасоў бярэ прафесійную касметыку, усё астатняе на акцыях, беларускай вытворчасці. Пральны парашок купляем адразу вялікімі аб'ёмамі, як і сродак для мыцця посуду.

АДЗЕННЕ:

Дакладную суму на месяц не назаву. Заўсёды па-рознаму. Абутак стараемся купіць добрай якасці сабе і дзецям. Самі носім па 2-3 гады, малодшы даношвае пасля старэйшага (звычайна захоўваецца выдатна). Каму ў якім годзе купіць вопратку, плануем загадзя. Вось у гэтым месяцы жонка на рынку купіла нядрэннае цёплае зімовае паліто за 80 рублёў. Я на зіму сабе браў куртку яшчэ ўвосень. У малодшага дзіцяці уся вопратка ў ідэальным стане засталася ад старэйшага. Жонка стараецца купіць старэйшаму добрую, якасную рэч, загадзя ведаючы, што яе зносіць яшчэ і малодшы. У старэйшага сына зімовая куртка з мінулага года (бралі на выраст). Рэчы купляем і ў крамах на акцыях, і на рынку, і ў сэкандзе. Таксама не грэбуем, калі хто-небудзь са сваякоў аддае.

Забавы:

Асабліва нікуды не ходзім. Усе нашыя забавы - гэта паходы з дзецьмі ў заапарк, забаўляльныя цэнтры, парк каруселяў, проста ў парк. Улетку выбіраемся на прыроду. Сума кожны месяц розная, бывае, што ўвогуле нікуды не сходзім за месяц. Дзецям купляем цацкі. На Дзень нараджэння і Новы год блізу 30-50 р, а так дробязь розную. Без нагоды цацку да 20 рублёў можам купіць, але не даражэй.

Калі няма патрэбы купляць вопратку, то атрымліваецца адкласці, але потым гэта выдаткоўваецца на добраўпарадкаванне жылля, бытавую тэхніку або ў машыне нешта зламаецца. Падораныя грошы не выдаткоўваем, нейкая сума заўсёды адкладзеная.

Вядома, хочацца жыць інакш, дазваляць сабе і сваёй сям'і больш, але не так лёгка знайсці працу больш аплатную або падпрацоўку. На сённяшні дзень жывем так, быў час, што жылі горш. Стала знаходзімся ў пошуку чагосьці іншага, лепшага.