У Крыме размешчаны яшчэ адзін дывізіён С-400

Дывізіён зенітных ракетных сістэм С-400 прыводзіцца ў поўную боегатоўнасць менш чым за пяць хвілін.

Расея ўзмацняе ваенную прысутнасць у анэксаваным ва Украіны Крыме ракетамі "зямля-паветра". У суботу, 13 студзеня, на баявое дзяжурства ў Севастопалі заступіў яшчэ адзін дывізіён зенітных ракетных сістэм (ЗРС) С-400 "Трыумф", паведаміў "Нямецкай хвалі" камандуючы Чацвёртым войскам ВПС і СПА генерал-лейтэнант Віктар Севасцьянаў.

Год таму назад пад Феадосіяй быў размешчаны першы дывізіён С-400. Севасцьянаў асабліва адзначыў высокія баявыя магчымасці комплексу С-400, які можа быць разгорнуты ў баявое становішча менш чым за пяць хвілін.

Баявыя магчымасці С-400

ЗРС далёкага дзеяння С-400 "Трыумф" прызначаны для паражэння самалётаў стратэгічнай і тактычнай авіяцыі, балістычных ракет, гіпергукавы’ мэтаў і іншых сродкаў паветранага нападу ва ўмовах радыёэлектроннага і іншых тыпаў процідзеяння. Сістэма здольная паражаць аэрадынамічныя мэты на далёкасці да 400 кіламетраў, на адлегласці да 60 кіламетраў - балістычныя мэты, якія ляцяць з хуткасцю да 4,8 кіламетра за секунду на вышынях ад некалькіх метраў да некалькіх дзясяткаў кіламетраў.

Са слоў Севасцьянава, ЗРС будуць абараняць расейскія межы не толькі на тэрыторыі Крыму, але і на значнай частцы Краснадарскага краю.

Расея анэксавала Крым у 2014 годзе. У адказ Еўразвяз і ЗША ўвялі супраць РФ эканамічныя санкцыі. У снежні ЗША абяцалі выдаць Украіне "пашыраны абарончы патэнцыял", уключаючы супрацьтанкавыя ракеты.