У Жыткавіцкім раёне пантонны мост знесла плынню

Мясцовыя жыхары зноў засталіся без пераправы праз Прыпяць.

Пра тое, што жыхары Жыткавіцкага раёна чарговым разам засталіся без пераправы праз Прыпяць стала вядома сёння ўначы. У сацыяльных сетках з'явіліся паведамленні, што парваліся тросы і пантонны мост знесла плынню. Са слоў відавочцаў, людзей праз раку перапраўляюць ратавальнікі.

У супольнасці таксама паведамляецца, што пацярпелых няма - на мосце ў момант надзвычайнага здарэння нікога не было. Карыстальнікі актыўна абмяркоўваюць здарэнне. Бо цяпер, каб дабрацца з Жыткавіч у Тураў і наадварот, зноў трэба ехаць у аб'езд. А гэта лішніх 250 км.

У Міністэрстве абароны пракаментавалі інцыдэнт.

- Праз рэзкае змяненне ўмоў надвор'я сарвала мацаванне моста. Прымаюцца меры па яго аднаўленні. Плануецца, што сёння рух будзе адноўлены, - паінфармаваў tut.by начальнік упраўлення інфармацыі Міністэрства абароны Уладзімір Макараў.

Нагадаем, наплаўны пантонны мост праз Прыпяць пабудавалі 10 снежня 2017 года - пасля таго як аварыйным прызналі «асноўны» 888-метровы аўтамабільны мост, на якім 7 снежня з'явіліся расколіны і ён правіснуў. Мост закрылі прыкладна на год. Прычынай разбурэння маглі стаць яго канструкцыйныя недахопы.