У Мазырскім раёне праваліўся пад лёд і патануў 13-гадовы школьнік

Сябар спрабаваў выратаваць падлетка з дапамогай палкі.

Кожны год супрацоўнікі МНС ратуюць дзясяткі людзей, якія вырашылі прагуляцца па свежым лёдзе або парыбачыць на самым пачатку або канцы зімы (а лепш падчас адлігі). На жаль, не ўсе выпадкі, калі лёд не вытрымлівае вагі чалавека, сканчаюцца шчасна. Пазаўчора ўвечары ў пасёлку Крынічны Мазырскага раёна адбылася трагедыя: пад лёд праваліўся і патануў 13-гадовы школьнік.

«12 студзеня а 17:23 паступіла паведамленне аб тым, што ў двух кіламетрах ад пасёлка Крынічны дзіця на возеры правалілася пад лёд. Са слоў сведкаў, двое школьнікаў гулялі па лёдзе. У нейкі момант адзін з іх праваліўся і з галавой сышоў пад ваду. Які застаўся на паверхні хлопчык спрабаваў выратаваць сябра з дапамогай палкі, але праз далікатны лёд выцягнуць яго не змог і пабег у пасёлак, які знаходзіўся за два кіламетры», паведамляе progomel.by.

А 17:55 работнікамі МНС пры дапамозе выратавальнай дошкі і багра цела 13-гадовага навучэнца мясцовай школы вынялі з вады і перадалі брыгадзе хуткай медыцынскай дапамогі. А 18:00 была канстатавана смерць дзіцяці.

На жаль, 13-гадовы школьнік стаў не адзіным загінулым. Дваіх рыбакоў, якія праваліліся пад лёд, таксама не змаглі выратаваць.

Адно надзвычайнае здарэнне адбылося ў Рагачоўскім раёне таксама пазаўчора, 12 студзеня мясцовыя жыхары а 14:30 выявілі на возеры паблізу пасёлка Беліцк ровар. Гаспадара транспартнага сродку паблізу нідзе відаць не было. На месца выехалі вадалазы, супрацоўнікі праваахоўных органаў. На паверхні вады быў знойдзены труп мужчыны. А 16:30 супрацоўнікі Рагачоўскага Таварыства ратавання на водах паднялі з вады цела. Загінулым быў пенсіянер 1955 года нараджэння.

Учора таксама не абышлося без ахвяр: двое дарослых мужчын праваліліся пад лёд у Смалявіцкім раёне. Інцыдэнт адбыўся на Пятровіцкім вадасховішчы. А 12:12 у службу выратавання паступіла паведамленне аб тым, што на вадасховішчы праваліліся пад лёд двое рыбакоў. Па прыбыцці ратавальнікаў было ўстаноўлена, што аднаму мужчыну дапамаглі выбрацца людзі, што знаходзіліся паблізу. Другога рыбака выцягнулі ратавальнікі, але, на жаль, мужчына 1977 года нараджэння загінуў.