Аляксандр Рыбак падаў заяўку на «Еўравізію 2018»
- 16.01.2018, 10:21
- 11,726
Беларус паводле паходжання плануе адправіцца ў Лісабон з песняй уласнага напісання.
Пераможца "Еўравізіі-2009" Аляксандр Рыбак падаў заяўку на міжнародны песенны конкурс гэтага года, паведаміў БелТА дырэктар ТАА "Гранд М’юзік" Андрэй Гузэль, які прадстаўляе інтарэсы артыста ў Беларусі.
Беларус паводле паходжання плануе адправіцца ў траўні ў Лісабон з песняй "That's How You Write Song" уласнага напісання ад Нарвэгіі. Прадстаўнікі спевака характарызуюць яе як дзівосную і вясёлую поп-песню са спасылкамі на дыска і фанк 70-х.
Сам артыст гаворыць пра песню, што будзе шчаслівы натхніць людзей верыць у свой талент і адважыцца запісаць усе ідэі і думкі на паперы. Кліп у падтрымку песні максімальна блізка адлюстроўвае яе змест.
Аляксандр Рыбак перамог з песняй "Fairytale" на "Еўравізіі" дзевяць гадоў таму з рэкордным для гэтага конкурсу вынікам (яму паставілі найвышэйшыя балы найбольшая колькасць краін). Песня таксама з'яўляецца самай папулярнай на YouTube з ліку тых, што калі-небудзь перамагалі ў гэтым конкурсе.
Цягам 9 гадоў, якія прайшлі пасля конкурсу "Еўравізіі" Аляксандр Рыбак не спачываў на лаўрах. Ён перамог у шоў талентаў Kjempesjansen, здабыў прэмію Hedda, прэмію "Грэмі", супрацоўнічаў з DreamWorks Animations, выступаў перад некалькімі прэзідэнтамі і гастраляваў амаль у 50 краінах. А надоечы Аляксандр Рыбак правёў 48 калядных тэматычных канцэртаў у Нарвэгіі.
Пра выбар нарвежцаў стане вядома 10 сакавіка, калі музыка ў ліку 10 удзельнікаў адбору прэзентуе сваю песню тэлегледачам.