Туск і Юнкер заклікалі Вялікую Брытанію застацца ў ЕЗ
5- 16.01.2018, 15:22
- 8,305
Кіраўнік Еўрарады і старшыня Еўрапейскай камісіі прапанавалі Вялікай Брытаніі не выходзіць з Еўразвязу.
Старшыня Еўрарады Дональд Туск і старшыня Еўрапейскай камісіі Жан-Клод Юнкер прапанавалі Вялікай Брытаніі не выходзіць з Еўразвязу, паведамляе DW.
Калі ж урад у Лондане не зменіць свой погляд на тое, што адбываецца, у наступным годзе брэксіт стане рэальнасцю з усімі негатыўнымі наступствамі, сказаў Туск падчас выступу ў Еўрапарламенце ў аўторак, 16 студзеня. Калі брытанцы зменяць сваё меркаванне, «нашы сэрцы па-ранейшаму адкрытыя» для іх, дадаў кіраўнік Еўрарады.
Юнкер у сваю чаргу падтрымаў Туска, выказаўшы надзею на тое, што ягоныя словы будуць пачутыя брытанскімі ўладамі. Не хацелася б, каб у Лондане прапусцілі міма вушэй, што «нашыя дзверы па-ранейшаму адчыненыя», падкрэсліў кіраўнік Еўракамісіі.
Брытанцы выказаліся за выхад краіны са складу ЕЗ на рэферэндуме ў чэрвені 2016 года, падтрымаўшы яго 52 адсоткамі галасоў. Апазіцыйныя брытанскія палітыкі, якія падтрымліваюць праеўрапейскую палітыку, патрабуюць правесці паўторны рэферэндум, спасылаючыся на тое, што многія брытанцы ў 2016 годзе не ўсведамлялі ўсіх наступстваў сваёй пастановы.