РПЦ хоча перавесці Расею на юліянскі каляндар

У РПЦ заявілі пра неабходнасць вярнуць у РФ каляндар часоў Хрыста.

Намеснік кіраўніка Сінадальнага аддзела ўзаемаадносін Царквы з грамадствам назваў каляндар «часткай карціны свету народа», паказаўшы на неабходнасць заставацца ў «праваслаўнай парадыгме» і перайсці назад на юліянскі каляндар, паведамляе РБК.

Замест дзейнага ў Расеі цяпер грыгарыянскага календара неабходна вярнуць юліянскі, скасаваўшы дэкрэт Саўнаркама, падпісаны ў 1918 году Уладзімірам Леніным, упэўнены першы намеснік старшыні Сінадальнага аддзела ўзаемаадносін Царквы з грамадствам і СМІ Маскоўскага патрыярхату Аляксандр Шчыпкоў.

«Я прыхільнік «старога стылю» і мяркую, што Расеі час вяртацца да юліянскага календара, які існаваў яшчэ ў часы Хрыста. Упэўнены, што рана ці позна гэта адбудзецца», - цытуе Шчыпкова «РИА Новости».

Расейская праваслаўная царква працягвае выкарыстоўваць юліянскі каляндар у набажэнстве, а таму, са слоў Шчыпкова, застаецца адзінай захавальніцай традыцый у Расеі.

«Каляндар - гэта не лічбы на паперы, а частка карціны свету народа. Мы знаходзімся ў сваёй праваслаўнай парадыгме і ў ёй павінны і заставацца», - падкрэсліў Шчыпкоў.

Юліянскі каляндар быў распрацаваны па даручэнні Юлія Цэзара групай астраномаў на чале з александрыйскім навукоўцам Сазігенам у I стагоддзі да нашай эры і ўведзены ў дзеянне эдыктам Юлія Цэзара з 1 студзеня 45 года да н.э.

Працягласць года, згодна з юліянскім календаром, складае 365,25 дня, што прыкладна на 11 хвілін даўжэй за сонечны год, а ў выніку за кожныя 128 гадоў назапашваецца адзін «лішні» дзень. У 1582 годзе рымскі папа Рыгор XIII выдаў булу аб пераходзе на новы каляндар, для кампенсацыі назапашанай розніцы было прапушчана дзесяць дзён, і за 4 кастрычнікам адразу наступіла 15 кастрычніка.

Каталіцкія краіны перайшлі на грыгарыянскі каляндар на працягу некалькіх гадоў, пратэстанцкім на завяршэнне пераходу спатрэбілася прыкладна паўтара стагоддзя. Пасля Расеі ад юліянскага календара адмовіліся Грэцыя (1924), Турцыя (1926) і Егіпет (1928).