Улады працягваюць пераслед Міхаіла Жамчужнага

Магілёўскі абласны суд 17 студзеня адхіліў скаргу палітвязня.

Магілёўскі абласны суд 17 студзеня адхіліў скаргу Міхаіла Жамчужнага на пастанову суда першай інстанцыі, які прызнаў правамерным спагнанне палітвязню, накладзенае ў горацкай калоніі №9, паведамляе spring96.org.

Згодна з матэрыяламі справы, 3 жнiўня 2017 года адміністрацыя калоніі змясціла Жамчужнага ў штрафны ізалятар за тое, што ён адмовіўся пераходзіць у атрад №13, дзе знаходзяцца зняволеныя з нефармальным нізкім статусам. Сваю адмову палітвязень назваў вымушанай дзеля захавання ўласнага гонару і рэпутацыі і адзначыў, што цяпер пры знаходжанні ў любым атрадзе гэтай калоніі яго жыццю і здароўю пагражае небяспека. Ён папрасіў забяспечыць яму бяспечнае знаходжанне ў пенітэнцыярных установах. Жамчужны таксама адзначыў, што да стварэння канфліктнай сітуацыі з іншымі вязнямі ён беспярэчна выконваў патрабаванні адміністрацыі.

Жамчужны беспаспяхова абскардзіў спагнанне вышэйстаячаму службоваму суду калоніі, а затым у Горацкі раённы суд, які 28 снежня 2017 года адхіліў скаргу. У касацыйнай скарзе ў абласны суд зняволены прасіў скасаваць пастанову суда першай інстанцыі і накіраваць справу на новы разгляд.

Як сказаў на судзе адвакат Вадзім Мушынскі, на працягу некалькіх гадоў ён аказвае юрыдычную дапамогу Жамчужнаму, і калі той адбываў пакаранне ў іншых папраўчых установах, такіх праблем не было.

«Пасля прыбыцця ў горацкую калонію ў яго ўзнікла канфліктная сітуацыя з асуджанымі, асноўнай прычынай якой сталі нефармальныя стасункі сярод зняволеных - негалосныя і няпісаныя правілы, якія, ні для каго не сакрэт, існуюць. Па надуманых прычынах паўстаў канфлікт, і іншыя зняволеныя палічылі, што Жамчужны павінен быць аднесены да зняволеных з нізкім статусам. Гэтага Жамчужны не прыняў», - сказаў абаронца, падкрэсліўшы, што адмова яго падабароннага была вымушаная, а суд першай інстанцыі не даў належнай ацэнцы ўсім акалічнасцям.

Мушынскі таксама паведаміў, што Жамчужнаму ўжо выказваліся прамыя пагрозы фізічнай расправы з боку асуджаных.

Нягледзячы на гэта, судовая калегія Магілёўскага аблсуда палічыла, што аб'ектыўных прычын для адмовы пераходзіць у іншы атрад у Жамчужнага не было, і пакінула пастанову суда Горацкага раёна ў дзеянні.

15 студзеня беларускія праваабаронцы звярнуліся з сумеснай заявай да заходніх дыпламатаў з просьбай запатрабаваць ад уладаў краіны спыніць жорсткае абыходжанне з палітвязнем Міхаілам Жамчужным.