Амерыканец абхітрыў Tesla з дапамогай апельсіна

Кіроўца проста замацаваў фрукт на стырне аўтамабіля.

Дэйв Мітан з Солт-Лэйк-Сіці падмануў убудаваны ў электрамабіль Tesla аўтапілот, замацаваўшы на стырне апельсін, піша knife.media.

Амерыканец пахваліўся на ютубе, як аўтамабіль едзе трасай з хуткасцю амаль 140 км/г - ён жа ў гэты момант здымае відэа.

Як піша Motherboard, ролік хутка выдалілі за небяспечны кантэнт. Нягледзячы на аўтаматычную сістэму дапамогі, «разумную» паркоўку і іншыя функцыі Tesla, гэта ўсё ж не беспілотны аўтамабіль, і паводле правілаў кіроўцу трэба трымаць руку на стырне - тут жа сілы, з якой на стырно ціснуў апельсін, выявілася дастаткова.

Са слоў прадстаўніка кампаніі, якога цытуе Gizmodo, уладальнікі Tesla атрымаюць дадатковую інструкцыю для выкарыстання аўтапілота.