Рынак кватэр у Менску ўстанавіў новы рэкорд у 2017 годзе

Небывалы рост попыту падвысіў і кошты на сталічнае жытло.

У 2017 годзе рынак сталічных кватэр устанавіў новы рэкорд паводле колькасці ўгод, абнавіўшы 10-гадовы максімум дасягнуты 2016 годам, піша ej.by.

Паводле звестак Нацыянальнага кадастравага агенцтва, у 2017 годзе ў Менску было зарэгістравана 16 023 угод куплі-продажу кватэр. Гэта на 3,9% больш, чым ў 2016 годзе (15 410 угод). Быццам і не такі ўжо вялікі рост, але ўлічваючы, што 2016 год устанавіў небывалы рэкорд для рынку, нават такі рост - гэта вельмі шмат. Пры гэтым, калі прааналізаваць фінансавы аб'ём угод, то 2017 год апярэдзіў 2016-ы не менш чым на 20%. Гэта адбылося за кошт таго, што ў мінулым годзе структура ўгод істотна адрознівалася ад папярэдняга рэкардсмэна.

У 2016 годзе асноўны рост рынку забяспечылі рэгіянальныя пакупнікі, якія набывалі ў асноўным самае таннае жытло. У 2017 годзе рост адбыўся за кошт беспрэцэдэнтнага зніжэння стаўкі рэфінансавання Нацбанка і, як вынік, сталі даступнымі крэдытныя рэсурсы, за якія набывалася ўжо больш якаснае і дарагое жытло. Небывалы рост попыту падвысіў і кошты на сталічнае жытло, якія выраслі ў сярэднім на 10%.

У прынцыпе, ужо ў першы квартал 2017 года пачаў упэўнена апярэджваць 2016 год. Аднак у красавіку пайшло сезоннае зніжэнне попыту, у той час як у 2016 годзе ў гэты час акурат пайшоў значны рост за кошт рэгіянальных пакупнікоў. У выніку чатыры месяцы 2017 год сур'ёзна саступаў свае пазіцыі папярэдніку. Але са жніўня, пасля чарговага ліпеньскага зніжэння стаўкі рэфінансавання Нацбанка да 12% гадавых, пакупнікі кінуліся па кватэры. 2017 год упэўнена пайшоў у рост, які яшчэ больш паскорыўся, калі ў верасні, а потым і ў кастрычніку стаўка рэфінансавання яшчэ двойчы знізілася на 0,5%.

Таму, калі жнівень 2017 года апярэдзіў жнівень 2016 года ўсяго на 2,7%, то верасень ужо на 6%, кастрычнік - 26,2%, лістапад - 27,8%, снежань - 32,5%. Іншымі словамі, рост ідзе і, хутчэй за ўсё, прадоўжыцца ў 2018 годзе, хоць рынак ужо пачаў адчуваць некаторы дэфіцыт прапановы.

Цікава, што рост попыту на кватэры адбыўся ва ўсёй краіне, а не толькі ў Менску. І гэта пры тым, што ў 2016 годзе, на фоне росту попыту на сталічныя кватэры, рэгіёны падалі.

Паводле звестак Нацыянальнага кадастравага агенцтва, калі ў 2016 годзе ва ўсёй Беларусі было зафіксавана 48 294 угод куплі-продажу кватэр, то ў 2017 годзе – 50 002 угод або на 3,5% больш.