Беларусам прапануюць выбраць найлепшую паштовую марку 2017 года
5- 19.01.2018, 19:37
- 11,783
З 29 студзеня да 28 лютага ўсе ахвочыя могуць паўдзельнічаць у конкурсе-апытанні на найлепшую марку.
РУП «Белпошта» абвясціла конкурс-апытанне на найлепшую паштовую марку 2017 года, паведамляе прэс-служба кампаніі.
З 29 студзеня да 28 лютага ўсе ахвочыя могуць паўдзельнічаць у конкурсе-апытанні на найлепшую марку.
Для гэтага трэба зайсці на сайт «Белпошты» ў раздзел «Філатэлія», спампаваць бланк анкеты, запоўніць яго, указаўшы нумар найбольш упадабанай паштовай маркі або паштовага блока, і даслаць на электронны адрас vinch@belpost.by. Азнаёміцца з умовамі конкурсу і запоўніць прапанаваную анкету таксама можна ў любым аддзяленні паштовай сувязі краіны.
Сярод усіх удзельнікаў апытання, якія даслалі лісты ў названы тэрмін з правільна запоўненай анкетай і якія назвалі марку-пераможцу, будуць разыграны прызы - наборы філатэлістычнай прадукцыі.
Найлепшай будзе прызнаная тая паштовая марка альбо блок, за якую прагаласуе большасць удзельнікаў.
У леташнім конкурсе пераможцам стаў паштовай блок «Пчалярства ў Беларусі». За гэты ж блок Беларусь заняла 8-е месца конкурсу на званне самай прыгожай маркі свету 2016 года «Вялікі прыз выставы WIPA» ў Аўстрыі.