Чаму ў снегапад на беларускіх дарогах «каша»?

Камунальнікі адказалі на прэтэнзіі, што «снег зноў прыйшоў нечакана ў студзені».

У трэці за зіму снегапад Гародня ўвечары 17 студзеня зноў стаяла ў корку: на дарогах снежная «каша», слізкае пакрыццё, аварыі. Камунальнікі адказалі на жарты, што «снег зноў прыйшоў нечакана ў студзені», піша hrodna.life.

«Працуем кругласутачна»

- Мы працуем кругласутачна. Ездзілі ўсю ноч на сераду, перад пачаткам снегападу. Раніцай горад быў у добрым стане, дарогі чорныя. Калі пайшоў дробны снег, мы зноў паехалі, дзесьці а 9.30. Машыны працуюць дагэтуль. Цяпер чысцім прыватны сектар, пашыраем праезную частку і абочыны дарог на пад'ездзе да горада. Рыхтуемся да заўтрашняга снегападу.

Задзейнічаная ўся тэхніка, - тлумачыць намеснік дырэктара прадпрыемства «Спецаўтагаспадарка» Франц Пачобут.

Чаму тады пры кругласутачнай працы і поўнай занятасці ўсёй тэхнікі, горад зноўку і зноўку ў заторах з пачаткам снегападу?

- Прабачце, але гэта зіма. У нас няма такіх тэхналогій, каб мы маглі адразу плавіць снег. Таму нязручнасці ўзнікаюць. Але калі снег перастае падаць, то мы павінны расчысціць горад, - кажа Франц Пачобут.

Галоўнае - каб снег не стаў лёдам

Выяўляецца, чысціць снег пры снегападзе - не першая неабходнасць. Згодна з тэхналогіяй прыбірання, галоўнае - не дапусціць, каб сняжынкі зліпліся, ушчыльніліся, скруціліся і ператварыліся ў лёд. Для гэтага дарогі спачатку пасыпаюць сумессю жвіру і солі.

Машыны, якія рассыпаць сумесь, выязджаюць нават перад пачаткам снегападу.

- Калі паводле прагнозу ў найбліжэйшыя тры гадзіны чакаецца снег, туман, галалёдзіца, дождж, то праводзіцца прыбярэжная апрацоўка. Калі пачынае падаць снег, мы зноў выязджаем і перасыпаем сумессю. Калі снегу ўжо шмат, перамяшчаем яго з праезнай часткі на бок. Але асноўнае дзеянне - перасыпаць, - тлумачыць Франц Пачобут.

Калі снег перасыпалі, то яго перамяшчаюць з праезнай часткі ў бок абочын, ходнікаў. Дазваляецца перакрываць да 30% тратуараў. Цікава, што ёсць нормы для шырыні вала прыбірання снегу: не шырэй за 1 метр і не вышэй за 40 см.

Не выстарчае тэхнікі

Другая прычына - на наш горад не выстарчае існай тэхнікі для прыборкі снегу. У «Спецаўтагаспадарцы» працуюць 14 трактароў, 23 машыны, якія рассыпаюць сумесь, і 2 пагрузчыкі, якія яе туды загружаюць.

Аднак на нашу колькасць дарог патрэбныя 54 сумесеразмеркавальнікі, гэта значыць, на 30 штук больш, чым цяпер. На закупы не стае фінансаў. Адзін такі размеркавальнік каштуе блізу 50 тысяч даляраў, на 30 штук трэба 1,5 мільёна даляраў.

Улічваючы, што зімы сталі цяплейшымі і амаль бясснежнымі, куплю можна ўважаць за «немэтазгодную». Усё ж праз дзень дарогі расчысцілі. А колькі той зімы?