Чатыры хібы Качанавай

Як можна патрабаваць з чыноўнікаў ніжэйшага звяна тое, з чым не спраўляецца вышэйшае кіраўніцтва?

Кіраўніца адміністрацыі Лукашэнкі Наталля Качанава не ў першы раз заклікае «актыўна працаваць з людзьмі на месцах».

Раней гэты пасыл быў агучаны на адрас мясцовых органаў улады. Днямі ён прагучаў для чальцоў «Белай Русі», піша gazetaby.com.

- Мы павінны краіну зрабіць ідэальнай, - заявіла кіраўніца прэзідэнцкай адміністрацыі. - Зроблена шмат, але калі паглядзіш на месцы: то там праблема, то там. Калі мы, кожны, будзем гэта бачыць і кожны раз казаць таму, хто павінен быў гэта зрабіць, то сітуацыя зменіцца ў лепшы бок.

Са словамі Качанавай цяжка не пагадзіцца.

Што цікава, кіраўніца адміністрацыі Лукашэнкі, якая вучыць працаваць з людзьмі на месцах, сама не дэманструе поспехаў у працы з грамадзянамі.

Успомнім ейны другі прыём пасля прызначэння на пасаду, які адбыўся ў кастрычніку мінулага года. Больш за сто чалавек чакалі ў чарзе, каб патрапіць да Качанавай.

Як распавядала праваабаронца Тамара Сяргей, людзей спрабавалі пераканаць, што ўсіх не прымуць - яна ж жывы чалавек.

- Калі на асабісты прыём да высокай службовай асобе прыходзіць сто чалавек, - гэта паказчык неэфектыўнасці дзяржаўнай сістэмы, - упэўненая праваабаронца.

Як абвяшчае народная мудрасць, рыба гніе з галавы. Як можна патрабаваць з чыноўнікаў ніжэйшага звяна тое, з чым не спраўляецца вышэйшае кіраўніцтва?

Азірнуўшыся па баках, бачыш нямала прыкладаў, якія крокі ўладныя людзі робяць, каб стаць бліжэйшымі да людзей. Шкада толькі, гэтыя прыклады з іншых краін.

Ідуць у народ

Гэта робяць многія палітыкі. Напрыклад, прэзідэнт Украіны Пятро Парашэнка, які днямі шпацыраваў Львовам і вітаўся за руку з мінакамі.

Як адзначыў адзін з падпісантаў у запісе Парашэнкі ў Фэйсбуку, толькі ў еўрапейскай дзяржаве прэзідэнт можа так папросту прайсціся горадам. «У Расеі або Іране гэта немагчыма», - дадаў ён.

Ды і ў Беларусі нерэальна ўявіць, каб прэзідэнт або кіраўніца ягонай адміністрацыі прайшліся, скажам, вечаровым Полацкам і пагутарылі з мясцовымі жыхарамі, якіх выпадкова сустрэлі, а не якія прайшлі кастынг у ідэолагаў і спецслужбаў. І як звычайныя турысты зазірнулі б у прыбіральню каля Сафійскага сабора і са здзіўленнем выявілі, што вечарамі яна не працуе.

Радуюцца простым рэчам, як гэта робяць звычайныя людзі

Напрыклад, першаму сапраўднаму снегу, як прэзідэнтка Літвы Даля Грыбаўскайтэ.

Пры гэтым нікому і ў галаву не прыйдзе, што аўтараў негатыўных каментароў у Фэйсбуку кіраўніцы дзяржавы могуць пераследваць.

Умеюць эканоміць бюджэтныя сродкі

Свежы прыклад - прэзідэнт Польшчы Анджэй Дуда, які перасеў на электрамабіль пасля таго, як заявіў пра гатоўнасць краіны канкураваць з развітымі заходнімі краінамі ў пытаннях пашырэння парку аўтамашын з электрарухавікамі.

Як паведамляе auto-swiat.pl, днямі на стаянцы каля ўрадавага будынкам у Варшаве з'явілася BMW i3 Дуды на электрычнай цязе. Такім чынам, кіраўнік Польшчы надумаў падаць прыклад чыноўнікам.

Раскошныя падарункі ахвяруюць на дабрачыннасць

Так паступіў Папа Рымскі Францішак, атрымаўшы падарунак ад кампаніі Lamborghini - суперкар Huracan у эксклюзіўным выкананні коштам 200 000 даляраў.

Паводле пастановы пантыфіка суперкар будзе прададзены на аўкцыёне Sotheby's, таргі адбудзецца 12 траўня 2018 года. Сродкі, атрыманыя з продажу аўтамабіля, пойдуць на дабрачыннасць.

А што, выдатная ідэя - прадаць аўтапарк Лукашэнкі, уключаючы падораны Maybach, а атрыманыя грошы ахвяраваць на дапамогу хворым дзецям.