Абама вяртаецца

Чаму экс-прэзідэнт ЗША зноў акунецца ў вялікую палітыку.

Цяперашні прэзідэнт ЗША Дональд Трамп мае рэкордна нізкія рэйтынгі, электарат у ім расчараваны. Newsweek (пераклад - focus.ua) распавядае пра тое, чаму на гэтым фоне Барак Абама наважвае аднавіць актыўную палітычную дзейнасць.

Калі ў 2016 годзе ў ЗША праходзілі выбары ў кангрэс, Рэспубліканская партыя баялася, што не зможа набраць досыць галасоў. Тагачасныя апытанні грамадскай думкі прадказвалі перамогу дэмакратам. У выніку ці то амерыканцы стаміліся ад палітыкі партыі папярэдняга кіраўніка Белага дома, ці то разлікі сацыёлагаў былі няслушнымі, але перамаглі рэспубліканцы.

У лістападзе 2018 плануюцца новыя выбары ў кангрэс. На іх аднапартыйцам Дональда Трампа давядзецца ладна папацець, бо ў палітыку збіраецца вярнуцца Барак Абама, каб падтрымаць кандыдатаў, якія падзяляюць яго каштоўнасці.

Апазіцыянер

У 44-га амерыканскага прэзідэнта Барака Абамы на працягу васьмі гадоў знаходжання ва ўлады не было ні хвіліны для адпачынку. Пасля сыходу з пасады кіраўніка дзяржавы ён абяцаў застацца ў палітыцы і падтрымліваць чыноўнікаў, якія спрабуюць захаваць вынікі яго працы. Але, як і любому чалавеку, Абаму было неабходна адпачыць пасля стомнай і цяжкай працы, таму ён узяў паўзу на паўгода дзеля падарожжаў па свеце.

Аднак цяпер блізкія да Абамы людзі прагназуюць, што ў 2018-м ён будзе як ніколі палітычна актыўны. «Барак Абама ўвойдзе у 2018 год з вялікай падтрымкай электарату і яркай агітацыйнай кампаніяй», - заявіла ягоная прэс-сакратарка Кэці Хіл у каментары The Chicago Tribune.

У 2017-м Барак Абама неаднаразова расчароўваўся ў палітыцы 45-га прэзідэнта ЗША Дональда Трампа, адзначае Newsweek. Яго незадаволенасць выдатна ілюструе той факт, што Абама не называе свайго калегу па імені. Аднойчы ён нават назваў кіраванне цяперашняга гаспадара Авальнага кабінета «незвычайным часам для ЗША», у перакладзе з дыпламатычнай мовы гэта азначае «хаос». Абама крытыкуе Дональда Трампа за спробу скасаваць дзеянне сістэмы дзяржаўных страховак у ЗША, больш вядомую як Obamacare. Вішанькай на торце стала пастанова новага прэзідэнта выйсці з Парыжскага кліматычнага пагаднення, што выклікала абурэнне яго папярэдніка.

Нізкі рэйтынг

За першы год працы на пасадзе кіраўніка дзяржавы Трамп зарабіў сабе самы нізкі прэзідэнцкі рэйтынг за ўсю гісторыю апытанняў у ЗША - 32%, Абаму ў момант яго сыходу з Белага дома падтрымлівала 58% амерыканскіх грамадзян.

У верасні 2017 года 52% апытаных амерыканцаў заявілі, што яны б хацелі бачыць Абаму пры ўладзе. Нават у такім штаце, як Алабама, дзе гістарычна моцныя пазіцыі рэспубліканцаў, да канца 2017-га Абаму падтрымлівала больш за палову жыхароў. Апытанне FiveThirtyEight паказала, што ў амерыканцаў назапасілася шмат прэтэнзій да цяперашняга прэзідэнта: 54% апытаных заявілі, што Трамп несумленны, 47% адзначылі, што ён псіхічна нестабільны, а 48% заявілі, што яго трэба адправіць у адстаўку, звярнуўшыся да імпічменту.

На думку Newsweek, вяртанне Барака Абамы ў вялікую палітыку прывядзе да актывізацыі дэмакратаў і ўзмоцніць іх лагер. У 2017-м Абама выступіў у падтрымку кандыдата на пасаду губернатара Вірджыніі Ральфа Нортэма, а таксама Філа Мёрфа, які балатаваўся на пасаду кіраўніка штата Нью-Джэрсі. У 2018-м ён будзе яшчэ больш актыўна агітаваць за сваіх паплечнікаў.