Экспэрты пра кошты жылля ў Менску: «Такога яшчэ не было!»

Прапанова і далей будзе змяншацца, а кошты вырастуць на 10-15%.

З канца 2017 года рынак нерухомасці трасе, як у ліхаманцы. Ледзь мы аддыхаліся пасля ажыятажу на танныя кватэры ў Навінках, сталі чэргі па жытло на Калініна па $1200 за «квадрат», піша realt.by.

Кошты растуць, а прапанова радзее: на сёння ў Менску на продаж выстаўлена блізу 5 тысяч аб'ектаў. «Такога, - адзначаюць спецыялісты, - яшчэ не было».

Павел Астапеня, дырэктар агенцтва нерухомасці «Экспэрт»:

- У канцы 2017 гады я ўжо даваў каментар пра тое, што будзе адбывацца з коштамі, калі крэдытны махавік па-ранейшаму будзе працаваць. Што мы бачым сёння? Сітуацыя на рынку не ідзе ў разрэз з маімі словамі. Нават стабільна сытыя гады - нулявыя - не мелі вялікай колькасці крэдытных угод у навагодні перыяд (другая палова снежня - пачатак студзеня). Цяпер жа, нават нягледзячы на крызіс, крэдыты вельмі добра выдаюцца: і ў студзені 2018 года, і ва ўвесь снежань 2017 года нашы кліенты бралі крэдыты.

Гэта сведчыць аб тым, што рынак будзе развівацца, колькасць прапановы будзе змяншацца, а кошты расці. Гэта будзе паўзучы рост, нічога суперглабальнага, але ў Менску, я думаю, на 10% -15% да канца года ўзровень коштаў падрасце.

Нягледзячы на тое, што ў Менску цяпер ёсць пэўныя праблемы з заробкамі ў параўнанні з сытымі гадамі, даходы ў сталіцы ўсё адно вышэйшыя, чым у рэгіёнах, а таму людзі сюды імкнуцца, пераязджаюць. Гэта таксама ўзмацняе попыт. Што тычыцца рэгіёнаў, то я не думаю, што там будзе вялікі рост, але на адсоткаў пяць кошты да канца 2018 года цалкам могуць вырасці.

Яўген Хлапецкі, сузаснавальнік агенцтва нерухомасці «Авангард Нерухомасць»:

- Паслянавагодні перыяд звычайна характарызуецца зніжэннем актыўнасці на рынку жылля. Але не заўсёды. У гэтым годзе мы адзначаем добры попыт - у студзені 2018 года пакупніцкая цікавасць істотна апярэджвае актыўнасць прадаўцоў. Дэфіцыт прапановы часткова склаўся праз святы: некаторыя прадаўцы ўсё яшчэ не выйшлі з «навагодніх вакацый» і не абнавілі свае аб'явы аб продажы аб'ектаў.

З іншага боку, жаданне пачакаць з продажам можа быць выклікана і ростам коштаў. Людзі, у якіх пытанне продажу не стаіць востра, надумалі прытрымаць сваю нерухомасць, каб потым прадаць яе больш высокім рынкавым коштам.

Тое, што мы бачым цяпер у нашым агенцтве, гэта сапраўды добры попыт. Колькасць угод расце, рынак вельмі актыўны. Пакупніцкую цікавасць падаграюць і даступныя крэдыты на жыллё, і тэндэнцыя росту коштаў. Думаю, што да вясны колькасць аб'ектаў на рынку павялічыцца.

Наталля Радзеня, кіраўніца «Твая сталіца. Навабудцэнтр»:

- Напраўду, студзень пакуль яшчэ нічым не адзначыўся. Попыт на новабудоўлі па-ранейшаму дастаткова высокі, прыкладна на тым жа ўзроўні, што і ў снежні.

Набываюць новабудоўлі з задавальненнем, усё больш з прыцягненнем крэдытаў. Банкі працуюць над сваімі адмысловымі праграмамі, і ёсць сапраўды цікавыя прапановы.

Так, да прыкладу, даслоўна ўчора «БПС-Сбербанк» зноў знізіў стаўкі. Чым больш даступныя крэдыты і цікавейшыя праграмы, тым і попыт на новабудоўлі вышэйшы. Крэдытныя праграмы вельмі моцна спрыяюць набыццю новабудоўляў. Найбольшым попытам сёння карыстаюцца адна- і двухпакаёвыя аб'екты.