Адлічэнні ў інавацыйныя фонды могуць быць павялічаныя да 15-20%
3- 24.01.2018, 10:33
- 12,327
Сродкі будуць перапраўляцца з падаткаў на прыбытак.
Урад прапануе павялічыць адлічэнні сродкаў у інавацыйныя фонды да 15-20% ад падатку на прыбытак.
Пра гэта заявіў прэм'ер-міністр Беларусі Андрэй Кабякоў на пасяджэнні прэзідыума Савета міністраў, паведамляе tut.by.
Паводле ягоных слоў, у 2018 годзе пры поўным асваенні сродкаў інавацыйных фондаў і пры наяўнасці новых інавацыйных праектаў, якія адпавядаюць узроўню V-VI укладаў, магчыма выйсці з ініцыятывай да прэзідэнта Беларусі аб павелічэнні адсотка адлічэнняў у інавацыйныя фонды. «Калі такія адлічэнні ў інавацыйныя фонды складаюць 10% ад падатку на прыбытак, то магчымае павелічэнне гэтага нарматыву да 15-20% - колькі трэба. Такія падыходы будуць спрыяць прыцягненню дадатковых сродкаў і на развіццё навукі», - сказаў Кабякоў, якога цытуе прэс-служба ўрада.
Што да выкарыстання ў 2017 годзе сродкаў, то пры 100-адсоткавым засваенні сродкаў рэспубліканскага цэнтралізаванага інавацыйнага фонду не цалкам выкарыстанымі засталіся сродкі мясцовых інавацыйных фондаў (засваенне склала 68,5%). Найбольш праблемнымі ў гэтым пытанні з'яўляюцца Гарадзенская (засваенне склала 33,6%), Менская (26,1%) і Берасцейская (63,5%) вобласці. У астатніх рэгіёнах асваенне сродкаў склала ад 80% да 93%, гаворыцца ў паведамленні.
Пытанне своечасовасці і паўнаты асваення інавацыйных фондаў ужо разглядалася на пасяджэнні прэзідыума Саўміна ў кастрычніку 2017 года. Андрэй Кабякоў мяркуе, што аблвыканкамамі і Менгарвыканкамам для засваення названых сродкаў у поўнай суме былі прыняты недастатковыя захады.