Cанкцыі з рэжыму Лукашэнкі знятыя памылкова

У Беларусі нічога не робіцца без адпаведнага ўказа з Масквы.

Блакаванне сайта Charter97.org пракаментаваў Надзвычайны і Паўнамоцны амбасадар Украіны ў Беларусі ў 2010-2011 гадах Раман Бяссмертны:

- Першая чалавечая рэакцыя: чаму Лукашэнка так доўга цярпеў, чаму не заблакавалі «Хартыю-97» раней? Я здзіўлены, як сайту Сharter97.org атрымоўвалася нешта гаварыць, распавядаць, пратэставаць, арганізоўваць. На працягу ўсёй гісторыі «Хартыі-97» прымаліся спробы яе блакавання, ёй спрабавалі зачыніць рот і гэтак далей.

Нягледзячы на тое, што шмат хто казаў пра «лібералізацыю» (успомнім лета 2010 года, калі была спроба «перазагрузіць стасункі» ЕЗ і Менска), першапачаткова было зразумела, што ўлада Беларусі зробіць усё, каб заблакаваць «Хартыю-97».

Мяне здзіўляе, што блакаванне сайта адбываецца на фоне скасавання санкцый супраць Менска, якія, з майго пункту гледжання, знятыя абсалютна памылкова. Хачу перасцерагчы: думаць аб тым, што за блакаваннем стаіць Міністэрства інфармацыі - азначае не разумець палітычнай сітуацыі ў Беларусі, дзе ўсім кіруе толькі адзін чалавек.

Апошнім часам я выразна разумеў, што «Хартыя-97» вельмі моцна б'е па Лукашэнку. Cайт Charter97.org займаў абсалютна выразную пазіцыю наконт скасавання санкцый супраць рэжыму і аднаўлення эканамічнага супрацоўніцтва, якое з'яўляецца толькі працягам агоніі рэжыму. «Хартыя-97» - стрэмка для Лукашэнкі.

Па-другое, я заўсёды заяўляў, што працяг супрацоўніцтва Кіева з Менскам – угода з беларускім народам, а сёння - тым больш.

Махавік, які запушчаны з Масквы, можа падзяліць беларускае грамадства, бо частка беларусаў падтрымлівае Украіну, некаторыя ваююць на баку ВСУ на Данбасе, а частка, па заданні КДБ, ваююць на баку Расеі.

Не магу абысці тэму цяперашняга эканамічнага супрацоўніцтва паміж Украінай і Беларуссю. Нягледзячы на тое, што ў ім ёсць складнік абаронна-прамысловага комплексу, я першапачаткова разумеў, што нічога ў Беларусі не робіцца без адпаведнага ўказа з Масквы.

Нагадаем, што 24 студзеня рэжым Лукашэнкі заблакаваў незалежны інфармацыйны рэсурс Charter97.org. Блякаванне пацвердзіў першы намеснік міністра інфармацыі Ігар Луцкі. Падрабязная інструкцыя аб тым, як абысці блакаванне сайта Charter97.org, знаходзіцца тут.