Гатэлі ў гарадах Расеі падчас ЧС-2018: Неацэнныя ўражанні

Кошты выраслі да касмічных параметраў.

Як дабрацца і дзе жыць? Гэтыя два пытанні хвалююць кожнага заўзятара, які збіраецца наведаць усякі важны турнір. Не выключэнне і чэмпіянат свету ў футболе 2018 года ў Расеі. Традыцыйна кошты праезду і пражывання ў гатэлях падчас такіх мерапрыемстваў прыкметна павялічваюцца.

DW параўнала, наколькі падаражэюць нумары ў гатэлях у Маскве, Сочы і Казані, дзе свае матчы на групавым этапе правядзе нацыянальная каманда Нямеччыны.

Падаражанне месцаў у сталічных гатэлях за месяц - да 8,5 разоў

Першы прыпынак бундэстым на расейскіх футбольных палях - маскоўскі стадыён "Лужнікі". Тут нямецкія футбалісты згуляюць 17 чэрвеня з мексіканцамі. Спыніцца трэба будзе дзесьці і заўзятарам нацыянальнай каманды ФРГ. Возьмем для прыкладу нумары на двух чалавек у гатэлях ад трох да пяці зорак з найлепшымі водгукамі на папулярным сайце Booking.com.

За адну ноч у нумары буцік-гатэля The Rooms давядзецца выкласці не менш за 83 490 рублёў. За месяц да гэтага, 17-18 траўня, такі ж нумар абышоўся б 11 тысяч. Гэта значыць, у чэрвені ён каштуе блізу 750% ад травеньскага кошту.

У чатырохзоркавым буцік-гатэлі "Віла Кадашы" пераначаваць пасля матчу бундэстым можна будзе за 61 тысячу рублёў (359%), месяцам раней - за 17 тысяч. У "Чайкоўскім" цэннік павялічваецца з 6741 да 44 910 рублёў (666%). У трохзоркавай "Пакроўцы 6" 4300 рублёў праз месяц ператвараюцца ў 36 400 рублёў (846%), а ў гатэлі "Эсквайр" рост адносна невялікі - з 7110 да 15 750 рублёў (221%).

У Сочы і Казані - рост коштаў у 2-4 разы

23 чэрвеня гульцы нацыянальнай каманды Нямеччыны пазмагаюцца ў Сочы са спаборнікамі са Швэцыі. А адданыя фанаты бундэстым - з сочынскімі коштамі. Пяцізоркавыя сочынскія гатэлі на Booking.com на гэтую дату ў пачатку студзеня ўжо было не знайсці.

Люкс (звычайных нумароў ужо не засталося) у чатырохзоркавым гатэлі "Зорны" ў ноч з 23 на 24 чэрвеня абыдзецца 19 870 рублёў (228%), на 23-24 траўня ён жа каштуе 8 700 рублёў. Кошт за пакой у чатырохзоркавым "Чабатарове" падымаецца з 3400 да 8100 рублёў (238%). Трохзоркавы "Каляровы 5" у канцы траўня бярэ за нумар 2800 рублёў, цяпер - 8800 рублёў (314%), гатэль "Аледа" - дзве і восем тысяч рублёў (400%), адпаведна.

У Казані 27 чэрвеня футбалістаў нямецкай нацыянальнай каманды будуць супрацьстаяць паўднёвакарэйцы. Тут праз Booking.com ужо не знайсці нумароў у гатэлях ні з пяццю, ні з чатырма зоркамі. Пакой у трохзоркавым "Аб'екце 784" 27-28 траўня каштуе дзве тысячы, а 27-28 чэрвеня - шэсць тысяч рублёў (300%). У аналагічным па камфорту "Гатэль-транзіце" - 1530 і 4250 рублёў (277%) да і падчас ЧС-2018 адпаведна.

Да ЧС-2014 у Бразіліі гатэлі даражэлі амаль удвая

Перад мінулым чэмпіянатам свету ў футболе ў Бразіліі ў 2014 годзе назіралася збольшага такая сітуацыя. Паводле звестак "Асацыяцыі тураператараў Расеі" (АТАР), у чэрвені таго года кошты гатэляў у бразільскіх гарадах правядзення турніру выраслі амаль удвая ў параўнанні з травеньскімі. Самы вялікі рост быў адзначаны ў Фарталезе (+86% або 186% ад травеньскага кошту) і Натале (181%).

Каб не дапусціць празмернага росту коштаў гатэляў падчас ЧС-2018, Федэральная антыманапольная служба (ФАС) Расеі прапаноўвала ўвесці рэгуляванне коштаў такіх паслуг у перыяд правядзення міжнародных мерапрыемстваў - самітаў, канферэнцый і буйных спартовых падзей. Законапраект ФАС меркаваў, што кошты не павінны перавышаць больш чым на 20% сярэдні кошт гатэльнага абслугоўвання за папярэдні фінансавы год. Аднак Мінэканамразвіцця гэтую ініцыятыву не падтрымала.

Гатэлі з завышанымі коштамі абяцаюць штрафаваць

Зрэшты, пэўныя рамкі дзяржавай усё ж былі ўведзеныя. У лютым 2016 года ўрад РФ ўстанавіў максімальна дапушчальны кошт розных катэгорый нумароў у гатэлях усіх узроўняў у кожным асобным рэгіёне правядзення ЧС-2018. Напрыклад, у Маскве ў пяцізоркавым гатэлі люкс можа каштаваць падчас мундыялю не больш за 250 тысяч рублёў за ноч, звычайныя пакоі - да 50 тысяч рублёў. У трох зорках стандартныя нумары абмежаваныя парогам 12 250 рублёў. У Сочы стандартныя пакоі ў трохзоркавых гатэлях нельга здаваць больш чым за 4620 рублёў, у Казані - 9060 рублёў.

Расспажыўнагляд абяцае сачыць за выкананнем гэтых прадпісанняў. Згодна з артыкулам 14.6. Кодэкса РФ аб адміністрацыйных правапарушэннях, могуць аштрафаваць парушальнікаў у двухразовай суме незаконна атрыманага прыбытку. Растурызм збіраецца ўносіць гатэлі, якія завышаюць кошты, у чорны спіс. Зрэшты, гэты захад - фармальны і пагражае гатэлям толькі іміджавымі стратамі.

Авіябілеты пакуль не падаражэлі

У адрозненне ад праблемы "Дзе жыць?", іншае надзённае пытанне "Як дабрацца?" абяцае менш ударыць па кішэнях футбольных фанатаў. Па-першае, для ўладальнікаў квіткоў на матчы, якія аформілі пашпарт заўзятара, будуць запушчаныя дадатковыя цягнікі паміж гарадамі правядзення першынства. І гэтыя квіткі можна будзе бясплатна забраняваць. Зрэшты, напэўна, не ўсе захочуць ехаць, напрыклад, з Масквы ў Сочы цэлы дзень.

Для аматараў паветранага транспарту пакуль усё таксама выглядае нядрэнна: кошты авіяквіткоў, паводле звестак сайта Aviasales, падчас ЧС-2018 не павінны быць вышэйшымі, чым звычайна. Напрыклад, калі браняваць цяпер рэйс з Масквы ў Сочы або Казань, то кошт квітка на травень і чэрвень не адрозніваецца.