Ва Украіне заклікалі рыхтавацца да надзвычайнага аб'яднаўчага сабору

Заклік звернуты да ўсіх прыхільнікаў аўтакефаліі.

Украінская праваслаўная царква Кіеўскага патрыярхату заклікала іерархаў УАПЦ і Маскоўскага патрыярхату неадкладна прыступіць да падрыхтоўкі Надзвычайнага аб'яднаўчага сабора.

Пра гэта гаворыцца ў заяве УПЦ КП, паведамляе "Новое время".

Галоўная задача гэтага сабора - "прыняць пастанову аб царкоўным адзінстве, выбраць кіраўніка адзінай памеснай аўтакефальнай УПЦ, які ад яе імя атрымае патрыяршы і сінадальны Томас аб аўтакефаліі".

"Кіеўскі патрыярхат цалкам і беспярэчна падзяляе зварот Экуменічнага Патрыярхату да ўсіх уцягнутых бакоў з заклікам устрымлівацца ад захопу цэркваў, манастыроў і іншай маёмасці, а таксама ад усялякіх іншых гвалтоўных дзеянняў і помсты.... Працэс аб'яднання ўкраінскага праваслаўя павінен адбывацца добраахвотна, мірна і без прымусу" , - гаворыцца ў заяве.

Кіеўскі патрыярхат таксама заклікаў "епіскапат, духавенства і вернікаў УАПЦ, як і епіскапат, духавенства і вернікаў Маскоўскага патрыярхату, падтрымаць працэс аб'яднання ўкраінскага праваслаўя".

Нагадаем, Сінод Канстанцінопальскага патрыярхату скасаваў ліст Сінода ад 1686 года, пасля якога Кіеўская мітраполія трапіла пад юрысдыкцыю Масквы, аднавіў кананічны статус кіраўніка Украінскай праваслаўнай царквы Кіеўскага патрыярхату Філарэта і кіраўніка Украінскай аўтакефальнай праваслаўнай царквы Макарыя. Працэс выдачы Томас трывае.

Са слоў кіраўніка УПЦ КП Філарэта, Томас будзе атрыманы пасля абрання кіраўніка патрыярхату на "аб'яднальным саборы", у якім возьмуць удзел архірэі Кіеўскага патрыярхату, Украінскай праваслаўнай аўтакефальнай царквы і Маскоўскага патрыярхату.

Прадстаўнік УПЦ МП арцыбіскуп Клімент заявіў, што епархіі Маскоўскага патрыярхату не маюць намеру ўдзельнічаць у аб'яднанні ўкраінскіх цэркваў.

Са слоў прэзідэнта Украіны Пятра Парашэнкі, некаторыя прадстаўнікі УПЦ МП гатовыя ўзяць удзел у стварэнні адзінай Украінскай царквы пад вяршынствам Канстанцінопаля.