«У нас забралі апошні хлеб»: жыхарак Мазыра звольнілі пасля 30 гадоў працы

Крык душы былых работніц дзяржаўнага завода.

Лабарантка ААТ «Мазырскі спіртагарэлачны завод» Святлана Астапенка і Таццяна Хвашчэўская, звольненыя пасля 30 гадоў працы на прадпрыемстве, праз суд адноўленыя на працы, паведамляе gomel.today са спасылкай на naviny.by.

Пастанову аб аднаўленні, а таксама аб спагнанні сярэдняга заробку за перыяд вымушанага прагулу, кампенсацыі маральнай шкоды дзвюм працаўніцам прыняў 12 кастрычніка суд Мазырскага раёна.

На карысць Святланы Астапенкі суд пастанавіў спагнаць з завода 534 рублі за час вымушанага прагулу і 100 рублёў кампенсацыі маральнай шкоды. На карысць Таццяны Хвашчэўскай - адпаведна 644 і 100 рублёў.

Астапенка адпрацавала на прадпрыемстве 35 гадоў, Хвашчэўская - 32 гады. У ліпені работніцы былі апавешчаныя, што са жніўня кантракт з імі не будзе прадоўжаны. Іншай працы ім не прапанавалі.

«Выкінулі нас, як кацянят. Атрымліваецца - проста выперлі. Я не мела спагнанняў, усё жыццё добрасумленна працавала, гэта даведзена ў судзе. Вельмі крыўдна! Уявіце: дзе знайсці працу ў перадпенсійным узросце? Можна ж было неяк па-чалавечы з намі паступіць, прапанаваць іншую працу на заводзе», - распавяла Таццяна Хвашчэўская.

Яна з калегам звярнулася ў прафкам завода, але дапамогі жанчыны не атрымалі. З мясцовага выканкама на заяву прыйшоў адказ, што парушэнняў пры непадаўжэнні кантракту няма, усё законна.

«Мы прасілі: пакіньце нас на працы, мы спатрэбімся, у нас вялікі досвед. Нас ніхто не слухаў. У нас забралі апошні хлеб», - дадала Астапенка.

Заробкі ў лабарантак з 30-гадовым стажам былі блізу 260-270 рублёў на рукі.

Пазоў у суд звольненым работнікам дапамаглі скласці ў Гомельскім абласным прафзвязе работнікаў аграпрамысловага комплексу. Паміж прафзвязам і Міністэрствам сельскай гаспадаркі і харчавання ёсць пагадненне, згодна з якім наймальнікі абавязаныя прадаўжаць працоўныя стасункі з работнікам, які не меў спагнанняў за апошні год і добрасумленна працаваў, - калі работнік выказаў сваю згоду.

Пракуратура ў судзе падтрымала пазоў звольненых работніц.

Пры вынясенні пастановы суд растлумачыў, што жанчыны добрасумленна працавалі больш за 30 гадоў, прадпрыемства не прадоўжыла кантракт неправамоцна - парушыла калектыўную дамову і пагадненне паміж дзяржаўнымі органамі і прафзвязамі.

У панядзелак, 15 кастрычніка, Астапенка і Хвашчэўская маюць намер прыступіць да працы.