Расейская эканоміка патрапіла ў інвестыцыйны застой

Замежныя інвестыцыі скарачаюцца з рэкорднай у гісторыі хуткасцю, а рост унутраных запаволіўся да нуля.

Інвестыцыйны рывок, закладзены ў план паскарэння расейскай эканомікі на найбліжэйшыя 6 гадоў, які, па ідэі ўладаў, павінен забяспечыць мадэрнізацыю зношанай прамысловай інфраструктуры і рост з тэмпамі, вышэйшымі за сусветныя, пакуль застаецца толькі марай: замежныя інвестыцыі сыходзяць з Расеі з рэкорднай у гісторыі хуткасцю, а рост унутраных - запаволіўся да нуля, піша finanz.ru.

Такія звесткі прыводзіць Мінэканамразвіцця РФ у штомесячным дакладзе «Карціна эканомікі».

Паводле ацэнкі МЭР, калі ў чацвёртым квартале мінулага года, капітальныя ўкладанні раслі на 6,4% год да года, у першым квартале - на 3,6%, то ў другім - рост запаволіўся да 2,4%, а да жніўня спыніўся зусім (0%).

Закупкі абсталявання за мяжой скарачаюцца ўпершыню за два гады: у ліпені імпарт інвестыцыйных тавараў з далёкага замежжа ўпаў на 6,3%, а ў жніўні спад паскорыўся да 9,6%.

Яшчэ больш азмрочана выглядае статыстыка ў грузаперавозках інвестыцыйных тавараў: азначаны ў другім квартале спад (на 7,3%) да жніўня перарос у абвал удвая (на 14,4%).

Сітуацыя вельмі падобная на пачатак інвестыцыйнага спаду, мяркуе дырэктар аналітычнага дэпартамента «Лока-інвест» Кірыл Трэмасаў: нешта падобнае з дынамікай імпарту, які ў Расеі амаль на палову складаецца з машын і абсталявання, назіралася ў 2012 годзе, калі эканоміка пры рэкордна высокіх коштах нафты патрапіла ў інвестыцыйную дэпрэсію.

Яе сімптомы выяўляюцца і на будаўнічым рынку: аб'ёмы работ прадаўжаюць падаць - на 0,7% у ліпені, 0,9% - у жніўні (пасля скарачэння на 1,4% у 2017 годзе і 2,2% - у 2016 годзе).

Другая трывожная прыкмета - абрынанне замежных інвестыцый, паказвае Трэмасаў: у трэцім квартале наўпроставыя інвестары забралі з рэальнага сектара эканомікі беспрэцэдэнтныя 6 млрд даляраў.

Настолькі маштабнага сыходу бізнэсу статыстыка не фіксавала ні ў дэфолтным 1998-м, ні ў момант глабальнага крызісу 2008 года, ні ў 2014-м, калі далучэнне Крыма выявілася найбуйнейшым з часоў халодным вайны абвастрэннем стасункаў з Захадам.

За першую палову года Расстат зафіксаваў павелічэнне інвестыцый на 3,2%. Але гэтая лічба – фактычна, хімера: увесь рост быў забяспечаны за кошт лічбаў, якія наўпрост не адсочваюцца. Гэта альбо малы і сярэдні бізнэс, выдаткі якога статыстыка аператыўна не фіксуе, альбо іншыя «аперацыi, што не назіраюцца наўпроставымі статыстычнымі метадамі», якія Расстат далічвае, зыходзячы са сваіх матэматычных мадэляў, паказвае галоўны эканаміст РФНІ Дзмітрый Палявы.

Пры гэтым буйны бізнэс, які здае справаздачнасць наўпрост у Расстат, скараціў капітальныя ўкладанні - на 1%, да 4,608 трлн.

«Невялікі рост інвестыцый, пра які рапартаваў Расстат у апошнія гады, шмат у чым трымаўся на дзяржаўных будоўлях. Вонкавы і ўнутраны фон для прыватных інвестараў усе апошнія гады пагаршаўся і прадаўжае пагаршацца (пад пагрозай санкцый многія інвестпраекты пастаўленыя на hold)», - адзначае Трэмасаў.

Наступны этап інвестыцыйнай актыўнасці з боку дзяржавы можа пачацца не раней, чым праз год, дадае ён: гэтая акалічнасць робіць магчымым спад інвестыцый у найбліжэйшыя 12 месяцаў.