Навукоўцы патлумачылі, як сабакі разумеюць словы чалавека

Праўда, іх мозг працуе зусім не так, як наш.

Сабакі сапраўды разумеюць чалавечую мову. Праўда, іх мозг працуе зусім не так, як наш. Навуковая праца пра гэта апублікаваная ў часопісе Frontiers in Neuroscience. Коратка аб даследаванні распавядае сайт Універсітэта Эмары.

12 сабак розных парод некалькі месяцаў вучыліся адрозніваць прадметы па назвах і прыносіць той, пра які кажа гаспадар. У выпадку правільнага выбару сабакі атрымлівалі пачастунак.

Затым навукоўцы з дапамогай функцыянальнай магнітна-рэзананснай тамаграфіі праверылі, як працуе мозг сабак у момант гаворкі чалавека. Напрыклад, адзін з удзельнікаў даследавання Эдзі - мешанка залацістага рэтрывера і лабрадора. Ягоны гаспадар казаў «парася» і «малпачка», паказваючы адпаведныя цацкі. Пасля ён назваў выдуманыя словы «Бобі» і «бодмік» і паказваў незнаёмыя сабаку прадметы - капялюш і ляльку.

Выявілася, што большую актывацыю ў слыхавых абласцях мозгу сабак выклікалі незнаёмыя словы. У людзей звычайна ўсё наадварот: на вядомыя словы мы рэагуем больш актыўна.

Даследнікі мяркуюць, што сабакі адчуваюць жаданне ўладальнікаў быць зразумелым, таму вельмі актыўна рэагуюць на незнаёмыя словы. «Сабакі ў канчатковым выніку хочуць парадаваць сваіх уладальнікаў і, магчыма, атрымаць хвалу або ежу», - распавёў Грэгары Бернс, адзін з аўтараў працы.

У паловы сабак незнаёмыя словы актывізавалі вобласць мозгу, якую звязваюць з апрацоўкай лексічных адрозненняў. У другой паловы тарабаршчына задзейнічала іншыя рэгіёны - левую скроневую долю, міндалепадобнае цела, хвастатае ядро або таламус.

Магчыма, прычына адрозненняў - у розніцы парод або разумовых здольнасцяў.

«Сабакі могуць мець розную здольнасць і матывацыю да навучання і разумення чалавечых словаў, - мяркуе Бернс. - Але ў іх, відавочна, ёсць уяўленне пра сэнс слоў, а не толькі ўмоўныя рэфлексы».

Праўда, гэта не значыць, што гаварыць з сабакам - самы эфектыўны спосаб стасункаў з ёй. Іншыя даследаванні паказвалі, што нервовая сістэма сабак болей падрыхтаваная да візуальных і нюхальных сігналаў, чым да вербальных.