Беларуская чыгунка зоймецца адловам «зайцоў»

Ініцыятарам мерапрыемства з'яўляецца БРСМ.

19 кастрычніка чыгуначнікі ў Беларусі абвясцілі аб правядзенні акцыі «Стоп-заяц!» Дэклараваная мэта акцыі - падвышэнне культуры праезду пасажыраў у цягніках.

Ініцыятарам мерапрыемства, як паведамляе сайт чыгункі, з'яўляецца «БРСМ» беларускай магістралі. Падчас акцыі прадстаўнікі чыгункі будуць правяраць наяўнасць квіткоў у пасажыраў пры пасадцы або высадцы з цягнікоў. Таксама ўдзельнікі акцыі раздадуць пасажырам тэматычныя памяткі. Кантраляваць аплату за праезд будуць і супрацоўнікі міліцыі.

Усяго з пачатку года кантралёры правялі 41 513 праверак, што на 271 праверку больш, чым за аналагічны перыяд мінулага года. Асноўная ўвага надавалася цягнікам гарадскіх ліній і рэгіянальных ліній эканомкласу, на дзель якіх прыйшлося 96% ад агульнай колькасці праведзеных праверак.

За 9 месяцаў бягучага года да адміністрацыйнай адказнасці прыцягнулі 6 633 безбілетных пасажыры, з іх 5 662 заплацілі штраф на месцы. Агульная сума штрафаў склала 138,4 тысячы рублёў.

Беларуская чыгунка нагадвае, што цяпер штраф за безбілетны праезд у цягніках гарадскіх ліній складае ад 0,5 да 1 базавай адзінкі. Акрамя таго прадугледжаны штраф сумац 0,2 базавай адзінкі за неаплачаны правоз ручной паклажы.

Штраф за безбілетны праезд пасажыраў у цягніках рэгіянальных ліній складае 0,7 базавай адзінкі, у міжрэгіянальных і міжнародных лініях - 1 базавую адзінку.