Новае ва ўказе Лукашэнкі: як у беларусаў будуць адбіраць сельскія дамы

«Незапатрабаванае» жытло падлягае абавязковаму продажу.

Указам Лукашэнкі ад 13.06.2018 № 237 «Аб распараджэнні дзяржаўным жыллёвым фондам» (далей – Указ № 237) вызначаны парадак продажу незапатрабаванага жылля дзяржаўнаму жылому фонду ў сельскай мясцовасці, піша «Экономическая газета».

У якіх выпадках могуць быць прададзеныя незаселеныя жылыя памяшканні дзяржжылфонду ў сельскай мясцовасці?

Указам № 237 прадугледжана магчымасць продажу незаселеных жылых памяшканняў (жылых дамоў, кватэр), размешчаных у сельскай мясцовасці, і якія знаходзяцца ва ўласнасці Рэспублікі Беларусь, дзеллю ў праве ўласнасці на іх (далей – незаселеныя жылыя памяшканні).

Пры гэтым агаворана, што яго дзеянне не распаўсюджваецца на продаж жылых памяшканняў, размешчаных (размяшчаліся на дату пачатку будаўніцтва (рэканструкцыі), дату набыцця) у населеных пунктах з колькасцю насельніцтва да 20 тысяч чалавек, пабудаваных (рэканструяваных), набытых, у тым ліку з дзяржпадтрымкай, сельгасарганізацыямі.

Устаноўлена, што незаселеныя жылыя памяшканні могуць быць прададзеныя пры ўмове іх незапатрабаванасці цягам 6 месяцаў запар і больш для эксплуатацыі ў якасці жылля камерцыйнага выкарыстання (г.зн. арэнднага), сацыяльнага карыстання, памяшканняў манеўранага фонду і пісьмовай адмовы мясцовых выканаўчых і распарадчых органаў ад іх набыцця ў камунальную ўласнасць.

Адпаведныя дзяржорганы і юрыдычныя асобы павінны накіраваць прапановы мясцовым органам улады набыць незаселеныя жылыя памяшканні ў камунальную ўласнасць. Адказ аб намеры набыць такое жыллё павінен быць дадзены цягам 15-дзённага тэрміну.

Дарэчы, людзі, якія скардзяцца, што ім не ўдаецца высветліць, калі яны змогуць купіць жыллё, якое спадабалася, павінны зразумець, што ўказ №237 увайшоў у дзеянне з 17.09.2018 года, г. зн. менш за месяц таму, і праваўжывальная практыка яшчэ не напрацаваная.

Акрамя таго, гаворка ідзе аб дзяржаўным жыллі, працэдуру яго продажу ў адпаведнасці з заканадаўствам ніхто парушаць не стане. Тым больш што ў першую чаргу цікавяцца акурат незаселенымі дамамі ў Менскай вобласці, хай і не побач са сталіцай.

Хто прымае пастанову аб продажы такіх памяшканняў?

Пастановы аб продажы незаселеных жылых памяшканняў прымаюць дзяржорганы і рэспубліканскія юрыдычныя асобы, падпарадкаваныя дзяржорганам (якія ўваходзяць у іх склад), у аператыўным кіраванні або гаспадарчым падпарадкаванні якіх знаходзіцца такое жыллё, а таксама дзяржорганы, якія ўклалі дамовы бязвыплатнага карыстання ім.

Асобна агавораныя патрабаванні для продажу незаселеных жылых памяшканняў, пабудаваных за кошт сродкаў рэспубліканскага бюджэту, што накіроўваюцца на пераадоленне наступстваў катастрофы на ЧАЭС. Такое жыллё можа быць прададзена на ўмовах, устаноўленых Указам № 237, але толькі з ўзгаднення з Дэпартаментам ліквідацыі наступстваў катастрофы на ЧАЭС Міністэрства па надзвычайных сітуацыях.

Прычым пастановы аб продажы аднакватэрных жылых дамоў могуць прымацца без афармлення правазасведчвальных дакументаў на гэтыя жылыя дамы, а пры іх продажы без правядзення аўкцыёну – таксама без афармлення правазасведчвальных дакументаў на зямельныя надзелы, на якіх дамы размешчаныя.

Пастановы аб продажы такіх кватэр у дамах з блокаў і шматкватэрных жылых дамах таксама могуць прымацца без афармлення правазасведчаных дакументаў, але пры ўмове наяўнасці ў адзіным дзяржаўным рэестры нерухомай маёмасці, правоў на яе і ўгод з ёй звестак у дачыненні да капітальных будынкаў, у якіх яна размешчаная.

Ці можа купіць такое жыллё гараджанін, які надумаў змяніць месца жыхарства, ці ж яно прызначанае толькі для вяскоўцаў? Якім коштам такое жыллё будуць прадаваць?

Пакупнікамі ў гэтым выпадку могуць быць грамадзяне, якія стаяць на ўліку маючых патрэбу ў паляпшэнні жыллёвых умоў (у парадку чарговасці пастаноўкі іх на такі ўлік) у названых дзяржорганах і рэспубліканскіх юрыдычных асобах, а таксама ў арганізацыях недзяржаўнай формы ўласнасці, з якімі дзяржорганы ўклалі дамовы бязвыплатнага карыстання такім жыллём. Пры адсутнасці такіх чаргавікоў альбо іх адмове ад набыцця жылыя памяшканні могуць быць прададзеныя на аўкцыёне, у тым ліку і гараджанам.

Згодна з Указам № 237 продаж жылых памяшканняў ажыццяўляецца паводле ацэначнага кошту, але не вышэй за рынкавы, якія вызначаюцца па выніках незалежнай ацэнкі, праведзенай у адпаведнасці з заканадаўствам аб ацэначнай дзейнасці. Пры продажы на аўкцыёне пачатковы кошт продажу ўстанаўліваецца рынкавым коштам, але не ніжэй за ацэначны (які вызначаецца аналагічна), з паніжэннем на 15%.

Аплата кошту жылых памяшканняў пры іх продажы (у тым ліку на аўкцыёне) можа ажыццяўляцца ў растэрміноўку да 3 гадоў роўнымі дзелямі без індэксацыі плацяжоў.

Сродкі ад продажу пералічваюцца пакупніком у рэспубліканскі бюджэт цягам 30 каляндарных дзён з даты ўкладання дамовы куплі-продажу (пры продажы з растэрміноўкай плацяжу - з унясеннем першага ўнёску цягам 30 каляндарных дзён з даты ўкладання дамовы куплі-продажу), калі іншае не ўстаноўлена Лукашэнкам.

Разам з агульнымі патрабаваннямі ўказа № 237 дэталёвы парадак продажу названых незаселеных жылых памяшканняў выкладзены ў Палажэнні аб парадку продажу жылых памяшканняў, размешчаных у сельскай мясцовасці, і якія знаходзяцца ва ўласнасці Рэспублікі Беларусь, пастановай Саўміна ад 13.09.2018 №663, і палажэння аб парадку продажу жылых памяшканняў дзяржаўнага жыллёвага фонду на аўкцыёне, пастановай Саўміна ад 17.11.2010 № 1695.

Акрамя таго, адпаведныя мясцовыя «саветы дэпутатаў» вызначылі парадак і ўмовы продажу жылых памяшканняў, размешчаных у сельскай мясцовасці, і якія знаходзяцца ў камунальнай уласнасці, аналагічныя парадку і ўмовам, устаноўленым ва ўказе №237.

Указам №237 таксама ўнесены змены ва указ Лукашэнкі ад 26.07.2010 № 388 «Аб парадку распараджэння дзяржаўным жыллёвым фондам».