Парламент Македоніі адмовіўся галасаваць за змяненне назвы краіны

Кіроўнай кааліцыі пакуль не стае галасоў для ўнясення паправак у Канстытуцыю.

Парламент Македоніі пасля трох дзён дэбатаў не вынес на галасаванне прапанову ўрада аб унясенні змяненняў у Канстытуцыю для змены назвы краіны на Рэспубліку Паўночная Македонія.

Пра гэта паведамляе македонскае агенцтва МІА.

Сесія парламента ў сераду праходзіла без дэпутатаў апазіцыйнай партыі VMRO-DPMNE і кааліцыі «За лепшую Македонію». Яны абвясцілі, што адмаўляюцца ад дэбатаў, назваўшы іх бескарыснымі, і заявілі, што не будуць галасаваць за канстытуцыйныя змены.

Паводле інфармацыі Balkan Insight, кіроўнай кааліцыі пакуль не стае галасоў для ўнясення змяненняў у Канстытуцыю. На сёння 72 дэпутаты гатовыя падтрымаць прапанову ўрада, тады як неабходна мінімум 80 галасоў.

Парламенцкая сесія працягнецца ў пятніцу, чакаецца, што ў гэты дзень пытанне аб змене Канстытуцыі ўсё ж будзе вынесенае на галасаванне.

Раней прэм'ер-міністр Заран Заеў заяўляў, што калі парламент адмовіцца прыняць пагадненне з Грэцыяй, ён абвесціць датэрміновыя выбары.

Як паведамлялася, рэферэндум аб змене назвы Македоніі прызналі несапраўдным праз нізкі прыход выбарцаў.

Змену назвы краіны на Паўночную Македонію падтрымалі 91,46% грамадзян, якія ўзялі ўдзел у галасаванні. Супраць выступілі 5,65%.

Рэферэндум носіць кансультацыйны характар і цяпер лёс перайменаванне краіны вызначае парламент.