«Дэбаты? Мы не сыходзімся»: Золатаў адмовіўся ад сустрэчы з Навальным

Генерал Расейскай гвардыі пракаментаваў выклік палітыка.

Кіраўнік Расейскай гвардыі Віктар Золатаў «потым вызначыць», як адказаць палітыку Аляксею Навальнаму, які ў адказ на выклік на дуэль выклікаў яго на тэледэбаты, паведамляе «Інтэрфакс».

«Дэбаты? Я яго на іншае запрашаў. Таму мы з ім не сыходзімся», - заявіў ён (цытата паводле ТАСС).

Дырэктар Расейскай гвардыі патлумачыў, што прапаноўваў Навальнаму «спартовае спаборніцтва, не больш за тое».

«Мяне абвінавачваюць у тым, што я яго запрасіў для таго, каб яго збіць пасля таго, як ён абвясціў мяне карупцыянерам. Вось пасля прысуду мы паглядзім, меў ён рацыю ці не. Пасля гэтага акурат да гэтага пытання вернемся», - сказаў Золатаў.

Раней Золатаў выклікаў «на двубой» Навальнага пасля публікацыі расследавання ФБК аб закупках прадуктаў для Расейскай гвардыі.

Са свайго боку Навальны прапанаваў правесці «дуэль» у выглядзе дэбатаў на федэральным тэлеканале.

«Я ваш выклік прымаю, і, як належыць, выбіраю месца і зброю. Наша з вамі дуэль адбудзецца ў выглядзе дэбатаў у жывым эфіры Першага канала або ўсякага іншага федэральнага канала», - сказаў Навальны ў відэа на сваім YouTube-канале. У выпадку адмовы федэральных каналаў апазіцыянер выказаў ахвоту правесці дэбаты ў эфіры свайго YouTube-канала.