СМІ назвалі дзве версіі, за што Чапіга мог атрымаць «Героя Расеі»

Журналісты гатовыя апублікаваць дэталі расследаванняў.

Два СМІ прадставілі спікераў, якія назвалі свае версіі таго, за што Анатоль Чапіга мог атрымаць узнагароду «Герой Расеі».

Падазраваны Лонданам у атручванні Скрыпалёў Руслан Башыраў, сапраўднае імя якога, паводле версіі СМІ, Анатоль Чапіга, узначальваў аперацыю вывазу ў Расею экс-прэзідэнта Украіны Віктара Януковіча. Пра гэта заявіў былы журналіст Цэнтра ўправы расследаваннямі Сяргей Канеў са спасылкай на свае крыніцы, паведамляе «Громадське».

Са слоў Канева, менавіта за гэтую спецаперацыю Чапіга атрымаў званне «Герой Расеі». Журналіст абяцаў днямі апублікаваць дэталі расследавання. Журналісты канала не змаглі атрымаць пацвярджэнне гэтай інфармацыі ў адвакатаў Віктара Януковіча і пракурора ў справе.

«Новая газета» знайшла траіх таварышаў са службы Анатоля Чапігі. Яны выказалі сваю версію атрымання ўзнагароды. Са слоў аднаго з мужчын, Анатоль Чапіга «атрымаў узнагароду «Герой Расеі» за Крым».

«Праўда, не магу нават выказаць здагадку, чым канкрэтна Чапіга займаўся ў Крыме», - адзначыў суразмоўца.

Дарэчы, Канеў удзельнічаў у расследаванні The Insider і Bellingcat, дзе сцвярджалася, што абвінавачаны ў замаху на былога супрацоўніка ГРУ Сяргея Скрыпаля Руслан Башыраў палкоўнік ГРУ Анатоль Чапіга.

У 2001 годзе Чапіга з адзнакай скончыў Далёкаўсходняе вышэйшае агульнавайсковае каманднае вучылішча. На сайце акадэміі Чапіга паказаны ў якасці «ганаровага выпускніка».

«Ураджэнец вёскі Мікалаеўка, выпускнік ДУАКВ 2001 года, Чапіга Анатоль Уладзіміравіч тройчы быў у працоўнай выправе ў Чачэніі, мае больш за 20 узнагарод і знакаў адрознення. А ў снежня 2014 года палкоўніку Чапіга А.В. за выкананне міратворчай місіі прысвоена годнасць Героя РФ», - паведамляе сайт.

Прэс-сакратар прэзідэнта Расеі Дзмітрый Пяскоў заявіў, што не мае звестак аб узнагароджанні кіраўніком расейскай дзяржавы чалавека з прозвішчам Чапіга.