У Петрыкаўскім раёне прымусілі звольніцца перадавую даярку

Жанчына дайшла да адміністрацыі Лукашэнкі, але там ёй не дапамаглі.

Былая работніца філіяла прадпрыемства «Палессе-Аграінвест» у вёсцы Мышанка Петрыкаўскага раёна звярнулася ў kp.by. Таццяне Паўлючок таксама давялося звольніцца, а яна ж - перадавая даярка, яе партрэт і цяпер вісіць на Дошцы гонару каля райвыканкама. Як заатэхнік са стажам, да якой ніколі не было прэтэнзій, раптам аказалася не запатрабаванай?

- Я прапрацавала аператарам машыннага даення восем гадоў, але пасля таго, як на ферме змянілі брыгадзіра, пачаліся праблемы - чамусьці мы перасталі знаходзіць агульную мову з начальствам, якое не мае адпаведнай адукацыі. У выніку мяне абвінавацілі ў тым, што я разводжу малако вадой, прыношу страты прадпрыемству, і сказалі, што мяне не хочуць бачыць на ферме. Таму прапанавалі два варыянты - звальняцца на ўласнае жаданне або паводле артыкула, - распавядае Таццяна.

Жанчыне давялося напісаць заяву, але далей яна звярнулася ў адміністрацыю Лукашэнкі. Адтуль ліст пераслалі ў райвыканкам, але разбор на ўзроўні раённых уладаў нічога не даў. Таму на днях даярка звярнулася да старшыні Гомельскага аблвыканкама Уладзіміра Дворніка з просьбай пра асабісты прыём.

- Мяне несправядліва звольнілі, бо я не рабіла нічога, за што мяне трэба было пазбаўляць работы. У адміністрацыі гаспадаркі мяне назвалі скандалісткай праз тое, што я бараню свае правы. А я не прашу нічога, акрамя справядлівасці - каб мяне выслухалі і зразумелі, што я не рабіла таго, у чым мяне абвінавачваюць, - тлумачыць даярка.

З нагоды ліста ў адміністрацыю Лукашэнкі адбыўся сход з прадстаўнікамі райвыканкама, прадпрыемства і фермы. І ў выніку палічылі, што парушэнняў заканадаўства ў звальненні Таццяны Паўлючок няма. Пра што пісьмова апавясцілі ўдарніцу працы:

- Знайшоў пацвярджэнне канфлікт паміж вамі і брыгадзірам, аднак сутнасць канфлікту знаходзіцца па-за рабочых стасункаў.

Таццяна тлумачыць: абараніць сваю пазіцыю яна не змагла, таму што ніхто не спрабаваў разабрацца ў сітуацыі і ў сутнасць ліста да прэзідэнта не ўнікаў.

Наогул, прэтэнзій да новага кіраўніцтва фермы ў яе стае. Не толькі Таццяна, але і іншыя даяркі не згодныя з графікам працоўнага часу - у дзень даводзілася працаваць больш за восем гадзін і спаць па дзве-тры гадзіны.

- У выніку замест нас сталі набіраць вахты даярак з іншых раёнаў і нават з Украіны, таму што начальству так выгадней. Нам павінны плаціць за перапрацоўку, графік з намі ўзгадняць, а ім прасцей набраць з боку прыезджых, - уважае перадавая даярка. Яна спадзяецца, што абласныя ўлады яе пачуюць і дапамогуць аднавіць на працы.