У Беларусі могуць увесці адзіныя кошты на масавыя гатункі гарэлкі

Манаполію на алкаголь узмоцняць.

У Беларусі могуць прыняць пастанову аб усталяванні адзіных раздробных коштаў на некаторыя віды алкагольнай прадукцыі, паведамляе БелТА.

Такая прапанова разглядалася сёння на нарадзе ў кіраўніка Беларусі аб развіцці лікёра-гарэлачнай галіны, распавёў журналістам віцэ-прэм'ер Міхаіл Русы.

«Мы ўнеслі прапанову ўзмацніць захады дзяржрэгулявання праз масавыя віды лікёра-гарэлачных вырабаў (паводле аналогіі цэлага шэрагу краін) - усталяванне мінімальнага ўваходнага кошту, адзінай гандлёвай нацэнкі і, такім чынам, адзінага раздробнага кошту», - сказаў ён.

Са слоў топ-чыноўніка, такія падыходы будуць адпрацаваныя. Тым, хто будзе вырабляць прадукцыю прэміум-класа, эксклюзіўную, сувенірную, ніякіх абмежаванняў няма і не будзе. Яны будуць працаваць паводле дамоўных коштаў.

Намеснік прэм'ера растлумачыў, што гаворка, між іншым, ідзе пра масавыя гатункі гарэлкі, каб яны рэалізоўваліся ў крамах адным коштам шляхам устанаўлення аднолькавай гандлёвай нацэнкі. Пастанова па адзінай гандлёвай нацэнцы ўрадам ужо прынятая, дадаў ён.

«Белдзяржхарчпрам» як адзіны рэгулятар што да алкаголю

Таксама Міхаіл Русы паведаміў, што канцэрн «Белдзяржхарчпрам» прапануецца надзяліць функцыямі адзінага рэгулятара на рынку алкагольнай прадукцыі.

«На сёння гэта адно з вузкіх месцаў: у нас пяць органаў плюс аблвыканкамы займаюцца рэгуляваннем. Адзін - ліцэнзію, адзін - квоты, адзін - якасць вызначае», - заявіў віцэ-прэм'ер.

Ён адзначыў, што пастанова зноў абмеркаваць на вышэйшым узроўні развіццё лікёра-гарэлачнай галіны была прынятая ў тым ліку ў плане кантролю за выкананнем таго, пра што дамовіліся на такой жа нарадзе тры гады таму. Акрамя таго, з'явіліся прапановы ўзмацнення шэрагу падыходаў.

Агулам жа пастановы 2015 года, на думку топ-чыноўніка, згулялі пазітыўную ролю: дзяржаўныя прадпрыемствы сталі працаваць прыбыткова, павялічылі аб'ём пастаўкі на экспарт, роўна як і прадпрыемствы прыватнай формы ўласнасці.

«Будзем працаваць над узмацненнем ролі дзяржавы ў такіх функцыях, як квота на ўнутраны рынак і свабода на экспарт, кошт на масавыя віды гарэлак (уваходны плюс адзіная гандлёвая нацэнка і, адпаведна, раздробны кошт) і кантроль за якасцю», - сказаў ён.

Дыктатарам пастаўленая задача да новага года выпрацаваць механізмы і крокі, якія б дазволілі ўрэгуляваць і выраўнаваць умовы працы ў галіне як для дзяржаўных, так і прыватных прадпрыемстваў.