У Лукашэнкі ў СНД з'явіўся сур'ёзны спаборнік - наспявае канфлікт

Беларускі дыктатар і прэм'ер-міністр Арменіі моцна незадаволеныя адзін адным.

Чарговая сустрэча Лукашэнкі і Нікола Пашынян на саміце АДКБ прывяла да іх спрэчак. Пасля заўчаснага адклікання папярэдняга генеральнага сакратара арганізацыі Арменія разлічвала, што на пакінутыя паўтара года таксама прызначаць іх прадстаўніка. Аднак Лукашэнка пайсці на сустрэчу Пашыняну адмовіўся. На яго думку пасада генеральнага сакратара АДКБ мусіць дастацца наступнай па алфавіце краіне - Беларусі, піша «Салідарнасць».

Перамовы лідараў краін у Астане прайшлі за зачыненымі дзвярыма, але пра тое, што Лукашэнка і Пашынян не знайшлі агульных поглядаў можна здагадвацца па тым, што новага генеральнага сакратара АДКБ так і не зацвердзілі - цяпер спадзяюцца гэта зрабіць 6 снежня ў Санкт-Пецярбургу.

Кароткая пакуль гісторыя ўзаемаадносін Лукашэнкі і Пашынян засмучае.

У пачатку гэтага года Беларусь прадала пускавыя ўстаноўкі сістэмы залпавага агню «Паланэз» Азербайджану. Галоўнаму ворагу Арменіі, з якім наша краіна фармальна з'яўляецца саюзніцай па АДКБ.

З гэтай нагоды вясной новы прэм'ер Арменіі задаў нязручныя пытанні Лукашэнку пры асабістай сустрэчы. Пасля Пашынян сказаў, што рэакцыя кіраўніка Беларусі на яго словы «была нармальнай».

Але праблема ад гэтага не знікла. А цяпер вось Лукашэнка не пайшоў прэм'еру Арменіі на сустрэчу з нагоды генеральнага сакратара АДКБ. Пакуль кіраўнікі дзвюх краін прытрымліваюцца дыпламатычных выразаў, але, відавочна, адкрыты канфлікт паміж імі наспявае.

Варта таксама памятаць, што Лукашэнка і Пашынян - людзі зусім розных поглядаў і біяграфій. Кіраўнік Беларусі - класічны аўтарытарны кіраўнік, а прэм'ер Арменіі - перакананы дэмакрат і былы апазіцыянер, які прыйшоў нядаўна да ўлады дзякуючы вулічным пратэстам. Знайсці агульную мову ім будзе складана.