Канстанцін Астапук: Міліцыянты зганьбіліся на ўвесь свет
13- 12.11.2018, 15:37
- 50,590
Берасцеец, які выйшаў учора на пратэст ва ўборы ліса, пракаментаваў сваё затрыманне.
Затрыманы напярэдадні каля плошчы Леніна ва ўборы ліса берасцеец Кастусь Астапук 12 лістапада выйшаў на волю. Чакалася, што ў гэты дзень яго даставяць у ІЧУ для судовага працэсу, аднак яго выпусцілі з позвай на найбліжэйшую нядзелю, піша «Брестская газета».
«Яны сказалі, што будзе разбіральніцтва наконт лялькі. Учора на мяне складалі пратакол за ўдзел «у масавым мерапрыемстве». Я спаслаўся на артыкул 27 Канстытуцыі і сказаў, што не буду сведчыць супраць сябе і сваіх блізкіх. Ні ў якіх дакументах не падпісваўся. У нядзелю пайду ў РАУС. Я не ведаю, што там будзе: мяне адпусцяць у той жа дзень або зноў закрыюць ў ІЧУ», - распавёў Канстанцін Астапук.
Са слоў мужчыны, ён чакаў, што яго затрымаюць пасля гуляння на плошчы ва ўборы.
«У мяне было прадчуванне, што будзе захоп - мой вобраз быў гаворачым. Але ўсе бачылі, здымалі, што я раздаваў балонікі, гуляў з дзецьмі. Калі ўжо ў дзяцей цацку забіраюць - я не ведаю, што будзе далей. Я мяркую, гэтым яны зганьбіліся на ўвесь свет», - кажа Канстанцін Астапук.
З ягоных слоў, калі яго затрымлівалі, спачатку сказалі, што ён абвінавачваецца паводле крымінальнай справы, калі пасадзілі ў мікрааўтобус, выявілася - для высвятлення асобы.
«У РАУС былі ў шоку, што ў мяне хвост. Мяне пасадзілі на такое прамавугольнае сядзенне. Я кажу супрацоўніку АМАП: Расшпілі мне маланку ззаду. А ён кажа: а сам не дастанеш? Не. І ён мне дапамог расшпіліць. У гэты раз мяне абшуквалі як ніколі старанна. Не ведаю, што шукалі. Але я ведаў, куды ішоў, і быў падрыхтаваны: усе тэлефоны, усе ключы пакінуў дома», - распавёў берасцеец.
З ягоных слоў, убор ліса спачатку быў з ім у камеры, а потым яго забралі.
Добрыя людзі перадалі яму коўдру і ежу.
«У ІЧУ ўжо трошкі цяплей, але паветра ўсё адно цяжкае. Машкара на ўсёй столі. Я спытаў: а што, санэпідэмстанцыя тут не бывае? Але гэту заўвагу нават нікуды не запісалі. Хоць за мінулы месяц сёе-тое трохі памянялася ў лепшы бок», - рэзюмаваў Астапук.
Нагадаем, гэтай восенню берасцеец, які выступае супраць будаўніцтва пад Берасцем акумулятарнага завода, ужо быў аштрафаваны на падставе артыкулаў КаАП: на 14 базавых адзінак за знаходжанне на плошчы Леніна ў цішотцы з надпісамі супраць акумулятарнага завода і на 3 базавых - за непадпарадкаванне законнаму распараджэнню ці патрабаванню службовай асобы пры выкананні ёй службовых паўнамоцтваў.