Першая група каравана мігрантаў дасягнула мяжы ЗША

Для яе стрымлівання ЗША маюць намер перакінуць да мяжы з Мексікай вайсковы кантынгент.

Першая група каравана мігрантаў колькасцю 360 чалавек дасягнула мексіканскага горада Ціхуана, што на мяжы з амерыканскім штатам Каліфорнія.

Як паведамляе DW, група прыбыла ў Ціхуану на аўтобусах.

Большая частка каравана мігрантаў, якая налічвае да пяці тысяч удзельнікаў, усё яшчэ знаходзіцца за дзве тысячы кіламетраў ад амерыканскай мяжы, у Гвадалахары.

Яшчэ некалькі груп мігрантаў з Цэнтральнай Амерыкі, якія хочуць дабрацца да ЗША, таксама знаходзяцца на тэрыторыі Мексікі.

Нагадаем, 9 лістапада прэзідэнт ЗША Дональд Трамп падпісаў распараджэнне аб забароне выдачы прытулку мігрантам, якія нелегальна ўязджаюць у краіну.

Раней Трамп анансаваў скасаванне правы на атрыманне амерыканскага грамадзянства для дзяцей замежнікаў і мігрантаў, якія нарадзіліся на тэрыторыі Злучаных Штатаў.

Пачынаючы з 18 кастрычніка, да мяжы ЗША рухаецца караван мігрантаў з краін Цэнтральнай Амерыкі. Некалькі тысяч мужчын, жанчын і дзяцей уцякаюць ад гвалту, галечы і карупцыі на радзіме. Спачатку ў ім было 4 тысяч чалавек. Аднак неўзабаве, са звестак СМІ, іх колькасць узрасла да 10 тысяч чалавек.

Паліцыя Гандураса, Гватэмалы і Мексікі спрабавала спыніць уцекачоў, але ў яе нічога не атрымалася, і караван прадоўжыў свой рух да амерыканскай мяжы.

У сувязі з набліжэннем каравана мігрантаў ЗША маюць намер перакінуць да мяжы з Мексікай вялікі вайсковы кантынгент.