У Чачэрску п'яная жанчына разграміла будынак кавярні, чужое аўто і пад'езд
6- 17.11.2018, 11:13
- 15,436
Ён прымроіўся былы хлопец.
28-гадовая жыхарка Чачэрскага раёна вярталася дадому пасля выпівання спіртнога. На вуліцы Першамайскай жанчыне падалося, што наперадзе ідзе яе былы хлопец. Здавалася, малады чалавек зайшоў у цяпер пусты будынак былой кавярні. П'яная жанчына рушыла за ім.
Пераадолеўшы агароджу, хуліганка разбіла вокны і пракралася ўсярэдзіну. Перакуліла там стол, але мужчыны не знайшла. У адным з двароў ёй прымроілася, што прыпаркаваны аўтамабіль належыць былому хлопцу. Шквал эмоцый абрынуўся на транспартны сродак, у якім маладая асоба вырвала дзвярныя ручкі, зламала антэну, а потым, забраўшыся ў салон, пашкодзіла прыборную панэль і сарвала люстэрка задняга віду, чаму трэснула лабавое шкло. Дастаўшы з багажніка дызпаліва і маторную аліву, дзяўчына выліла змесціва дзвюх каністраў на асфальт, пасля чаго адправілася шукаць былога хлопца ў адну з кватэраў. У пад'ездзе паспрабавала вырваць паштовую скрыню, сарвала дзвярны званок і гучна грукала ў першыя-лепшыя дзверы. Уціхамірваць няпрошаную госцю давялося праваахоўнікам, якіх выклікала гаспадыня жылля.
На пасяджэнні суда, як і падчас папярэдняга следства, дзяўчына шчыра перапрашала, раскайвалася. Шкода пакрытая, віна цалкам прызнананя. У якасці пакарання жанчыне прызначылі адзін год папраўчых працаў, паведамляе checherskivestnik.by.