Праз снегапад у Берасці ўтварыліся коркі, на дарогах горада - дзясяткі ДТЗ

Камунальныя службы, як заўсёды, не гатовыя да снегападу.

Інтэрнэт-карыстальнікі, якія паспелі выехаць на дарогі Берасця ў снежную суботу 18 лістапада, не раяць гараджанам выходзіць з дому без патрэбы, піша «Брестская газета».

Так, сэрвіс «Яндэкс. Коркі» на 14:20 нядзелі паведамляе аб абцяжаранні руху на вуліцы Брэсцкіх дывізій ад мікрараёна Паўночны да Рэспубліканскай, на вуліцы Леніна ад Пушкінскай да Гогаля, на бульвары Касманаўтаў ад Дзяржынскага да праспекта Машэрава, на Машэрава ад бульвара да МОПР, на Пушкінскай ад Кірава да Піянерскай, усёй вуліцы Піянерскай, на вуліцы Маскоўскай ад Кобрынскага пуцеправода да вуліцы Шлюзавай і ад Ландшафтнай да Берасцейскага завулка, на Варшаўскай шашы ад Чырванасцяжнай да 28 Ліпеня, на вуліцах 28 Ліпеня і Суворава.

Таксама партал паведамляе аб 7 ДТЗ у горадзе. Так, 2 аварыі адбыліся на вуліцы 28 Ліпеня, па адной на Варшаўскай шашы, Маскоўскай, ля пад'езда да Бярозаўскага моста, на рагу Ковельскай і Жукава, на закругленні 2-га Заходняга тупіка.

На думку інтэрнэт-карыстальнікаў, камунальныя службы не гатовыя да снегападу. Аднак на сайце гарвыканкама такія здагадкі зняпраўджваюцца. Яшчэ 15 лістапада намеснік дырэктара ў санітарыі «Камунальніка» Алег Несцярчук паведаміў, што прадпрыемства амаль падрыхтавала пясчана-саляную сумесь. На гэты сезон запланаваная выкарыстаць амаль 20 тысяч тон сумесі. Яшчэ 1200 тон чыстага пяску напоўняць скрыні для пасыпання ходнікаў і пешаходных пераходаў.

У выпадку значнага пагаршэння варункаў надвор'я на вуліцах з'явяцца 29 раскідальнікаў пяску, 14 франтальных каўшовых пагрузчыкаў, 11 трактароў з адвалам і шчоткай, 20 самазвалаў для вывазу снегу, снегапагрузчык з канвеерам і экскаватар.

Кіраўніцтва «Камунальніка» арганізавала дзяжурства інжынерна-тэхнічных работнікаў, неабходнай тэхнікі і сродкаў пагрузкі пясчана-салянай сумесі. Пры багатым снегападзе дапамагчы камунальнікам гатовыя 15 прадпрыемстваў горада, здольных даць 160 адзінак дадатковай тэхнікі, сярод якой экскаватары, самазвалы і грэйдэры.