Пажары ў Каліфорніі: чаму так шмат людзей знікла без вестак
11- 19.11.2018, 15:05
- 16,823
Пажар распаўсюджваўся вельмі хутка, і многія жыхары былі вымушаныя паспешліва эвакуявацца.
За апошнія некалькі дзён колькасць людзей, якіх унеслі ў спіс зніклых без вестак у выніку пажараў у паўночнай частцы штата Каліфорнія, узрасла да больш чым 1200 чалавек. Затым яна знізілася да менш чым тысячы, паведамляе расейская служба BBC.
Гэтыя ваганні выклікалі сумятню ў розумах многіх жыхароў штата і афіцыйных асоб.
Пажар «Кэмп», як яго называюць, прывёў да гібелі 77 чалавек - гэта афіцыйны рэкорд, і колькасць загінулых адносна стабільная. Дык чаму спіс зніклых без вестак такі рухомы?
Адказ на гэтае пытанне не такі просты, як прызнаюць улады найбольш пацярпелага раёна - акругі Бьют. У пятніцу, калі колькасць зніклых перавысіла 1000, шэрыф Коры Ханеа назваў спіс зніклых «дынамічным».
«Пакуль тая інфармацыя, якую я вам перадаю, не надта дакладная, мы не выключаем, што ў спісе ёсць імёны-дублікаты», - сказаў шэрыф.
Улады паказваюць, што колькасць зніклых без вестак змяняецца праз тое, што спіс увесь час дапаўняецца і пераглядаецца на падставе новых паведамленняў, тэлефонных званкоў і імэйлаў, плынь якіх пасля 8 лістапада, калі пачаўся пажар, толькі павялічваецца.
Пажар распаўсюджваўся вельмі хутка, і многія жыхары былі вымушаныя паспешліва эвакуявацца. У гэтай абстаноўцы было цяжка атрымаць пацверджаныя звесткі пра зніклых людзей.
Цяпер сотні супрацоўнікаў выратавальных службаў і паліцыі ў суправаджэнні спецыяльна навучаных сабак вядуць пошук чалавечых парэшткаў у згарэлых дамах.
Некаторыя сродкі масавай інфармацыі адразу адзначылі дубляванне імёнаў або дзіўныя анамаліі ў спісе зніклых. Напрыклад, газета New York Times, напрыклад, пісала, што знайшла ў ранніх версіях спісу пяць чалавек ва ўзросце 119 гадоў.
Спецыяльна падрыхтаваныя сабакі дапамагаюць шукаць людзей сярод руінаў і пажарышчаў
Газета паведаміла, што ёй удалося знайсці некаторых людзей, уключаных у спіс, з дапамогай сацыяльных сетак.
Увагу прэсы прыцягнуў выпадак Тамары Конры, якая размясціла ў «Фэйсбуку» паведамленне пра тое, што яна жывая.
«Мой муж і я ніколі не былі ў спісе зніклых, - напісала яна ў чацвер на адной з спецыяльна адведзеных для пошуку старонак. - Нас не шукаюць сваякі. Я патэлефанавала і пакінула просьбу прыбраць нашы імёны са спісу».
Шэрыф Ханеа патлумачыў, чаму вызначыў не пярэчыць публікацыі неправераных спісаў.
«Для нас важна як мага шырэй распаўсюдзіць інфармацыю, каб пачаць пошук і апазнанне зніклых», - кажа ён.
Усяго ў штаце пажарам знішчана больш як 12 тысяч будынкаў, а загады аб эвакуацыі дзейнічаюць у некалькіх раёнах. Тысячы жыхароў размешчаныя ў часовых памяшканнях або хованках.
Таму ўладам вельмі цяжка ўстанавіць, хто менавіта знік, а хто трапіў у спіс выпадкова ці па непаразуменні. Сітуацыя ўскладняецца цяжкасцямі з сувяззю.
Пажар знішчыў многія мачты мабільнай сувязі і кабельныя лініі. У некаторых раёнах цяпер усталяваныя часовыя мачты мабільнай сувязі.
Тушэнне пажараў прадаўжаецца, але пройдуць тыдні да іх поўнай ліквідацыі
Улады вядуць улік аб'яў аб згубе людзей, якія размяшчаюцца сваякамі на дошках аб'яваў у часовых лагерах для эвакуяваных.
У сацыяльных сетках адкрытыя спецыяльныя старонкі, на якіх можна размяшчаць запыты аб зніклых.
У афіцыйным спісе зніклых у акрузе Бьют ёсць шмат імёнаў людзей сталага веку, што адлюстроўвае спецыфіку насельніцтва - у акрузе пражывае шмат пенсіянераў, якія набылі тут дамы пасля выхаду на пенсію.
У Парадайзе, амаль цалкам знішчаным агнём, пражывала 27 тысяч чалавек, блізу чвэрці жыхароў горада былі старэйшыя за 65 гадоў.
Эрык Рэйнбалд, начальнік паліцыі ў Парадайзе, кажа, што дэмаграфія горада паказвае на тыя складанасці, з якімі сутыкнуліся ўлады пры эвакуацыі састарэлых людзей у надзвычайных абставінах.
«Як і ў іншых месцах, у нас шмат людзей сталага веку, якія альбо ўжо не карыстаюцца машынамі, альбо наогул ніколі не кіравалі імі», - кажа начальнік паліцыі.
Такія людзі, калі ім удаецца выбрацца з небяспечных раёнаў, часта не маюць доступу да інтэрнэту ці тэлефона, каб паведаміць пра сябе сябрам і блізкім.
Шэрыф Ханеа кажа, што праз перасяленне многія з людзей, чые імёны апынуліся ў спісе зніклых, могуць нават не ўсведамляць, што іх шукаюць.
Са слоў ягоных супрацоўнікаў, гэты спіс публікуецца таму, што ўлады спадзяюцца з яго дапамогай заахвоціць людзей паведамляць пра свой лёс.
Улады просяць мясцовых жыхароў увесь час правяраць спіс і паведамляць ім праз тэлефон пра людзей, якія знаходзяцца ў бяспецы, з тым, каб засяродзіць абмежаваныя рэсурсы на пошуках іншых.