Рабаўніка банка ў Магілёве асудзілі на 15 гадоў узмоцненага рэжыму

Мужчына павінен кампенсаваць пацярпелым закладнікам маральную шкоду.

У Магілёве абвешчаны прысуд расейцу Паўлу Цімафееву, які абрабаваў аддзяленне «Беларусбанка», піша tut.by. Яго прызналі вінаватым у разбоі з мэтай завалодання маёмасцю ў асабліва значнай суме і захопе групы закладнікаў з карыслівых меркаванняў. Суд прызначыў яму пакаранне 15 гадоў калоніі ўзмоцненага рэжыму з канфіскацыяй маёмасці.

Акрамя таго, мужчына павінен кампенсаваць пацярпелым закладнікам маральную шкоду - па 5 тысяч рублёў кожнаму.

Пісталет Цімафеева знішчаць - ён, дарэчы, не быў баявым.

Мужчына не прызнаў на судзе сваю віну. Пракурор паведаміў, што Цімафееў нібыта заявіў добрыя намеры: маўляў, ён хацеў «прыцягнуць увагу праваахоўнікаў, што яны павінны быць гатовыя да такіх сітуацый».

Суд над Паўлам Цімафеева афіцыйна распачаўся 14 чэрвеня, але фактычна - 27 верасня. На першым пасяджэнні ён прысутнічаць не мог - у выніку ўскладнення пасля міліцэйскай кулі. Суд вызначыў адкласці слуханне да выздараўлення абвінавачанага.

Само рабаванне адбылося 20 лістапада 2017 года. Цімафееў уварваўся ў банк у масцы і з пісталетам. Гэта быў сігнальны пісталет, падобны на пісталет Макарава, але страляў ён не баявымі патронамі.

Адна з супрацоўніц банка паспела націснуць трывожную кнопку, але грошы нападніку аддала. Праўда, супрацоўнікі Дэпартамента аховы заблакавалі банкаўскае аддзяленне. Усе, хто быў унутры, сталі закладнікамі.

На патрабаванне расейца яму далі аўтамабіль. Закладнікам у аўто паехаў першы намеснік начальніка УУС Магілёўскага аблвыканкама Аляксандр Васільеў. У прыватным сектары міліцыянты пачалі аперацыю ў затрыманні рабаўніка. Ён пачаў уцякаць і адстрэльвацца, але мужчыну паранілі і затрымалі.