Польшча і Данія ўрэгулявалі 40-гадовую спрэчку пра марскую мяжу
2- 19.11.2018, 20:54
- 8,730
Польшча і Данія падпісалі Пагадненне аб дэмаркацыі межаў у Балтыйскім моры.
Польшча і Данія падпісалі Пагадненне аб дэмаркацыі межаў у Балтыйскім моры. Дакумент быў падпісаны падчас сустрэчы міністраў замежных спраў Польшчы і Даніі ў Брусэлі, паведамляе «Радио Польша».
Кіраўнік МЗС Даніі Андэрс Самуельсэн назваў падпісанае пагадненне гістарычным.
«Мы завяршылі перамовы, якія пачаліся больш за 40 гадоў таму, і ў той жа час зрабілі першы крок да фармалізацыі пагаднення. Гэта выдатная навіна, якая дэманструе нашу прыхільнасць развязанню складаных пытанняў шляхам перамоў», - сказаў міністр замежных спраў Даніі.
Са слоў кіраўніка польскага МЗС Яцэка Чапутовіча, падпісанне пагаднення аб дэмаркацыі марскіх межаў з'яўляецца важным момантам у двухбаковых стасунках Польшчы і Даніі.
«Гэта падзея паказвае, што пры двухбаковым удзеле, узаемным даверы і павазе можна паспяхова развязваць нават працяглыя спрэчкі. Я глыбока перакананы ў тым, што абедзве краіны ў самыя кароткія тэрміны завершаць унутраныя працэдуры, неабходныя для ўступлення Пагаднення ў дзеянне», - сказаў кіраўнік польскай дыпламатыі.
Перш, чым уступіць у дзеянне пагадненне павінна быць прынятае ў рамках унутраных працэдур абедзвюх краін.