«Зараз народ рынецца мяняць лысую гуму»
7- 20.11.2018, 9:26
- 15,383
Снег ужо прынёс сюрпрызы беларускім аўтамабілістам.
У Менску тыдзень пачынаецца бясснежна, але ўсё адно раніцай сталіца засела ў заторах. Між тым у мінулыя дні ў многіх рэгіёнах краіны снег выпаў, і гэта значна паўплывала на дарожную абстаноўку. Ёсць інфармацыя аб сур'ёзных аварыях у Берасцейскай, Гомельскай, Магілёўскай абласцях, піша onliner.by.
Карыстальнік форуму onliner з нікам elvis1970 апублікаваў відэа з Берасця. Там і снег, і галалёдзіца.
- Зараз народ рынецца мяняць гуму: летнюю на зімовую. Гэта раней не было разумення: летняя гума, зімовая. Была гума лысая - першы варыянт, а другі варыянт - яшчэ паездзіць. Дзядулі нашы ездзілі на «Жыгулях», на «Масквічах», - адзначыў аўтар відэа.
У ДАІ Берасцейскай вобласці паведамілі аб ДТЗ, якое здарылася 18 лістапада на аўтадарозе Р6 (Івацэвічы - Пінск - Столін). Паводле папярэдняй інфармацыі, 21-гадовы кіроўца Chrysler на закругленні дарогі няправільна выбраў хуткасць руху, не справіўся з кіраваннем і ўчыніў наезд на металічную бар'ерныя агароджу.
- У выніку наезду пасажыры (17-гадовая дзяўчына і 20-гадовы хлопец) з рознымі траўмамі шпіталізаваныя. Паводле факту ДТЗ праводзіцца праверка, - распавялі ў Дзяржаўтаінспекцыі.
Яшчэ адна аварыя таксама 18 лістапада адбылася ў Лунінецкім раёне.
- 25-гадовы жыхар Менска, кіруючы аўтамабілем Volkswagen, рухаўся па аўтадарозе М10 (Мяжа Расеі - Гомель - Кобрын) з боку Гомеля ў кірунку Кобрына. Паводле папярэдняй інфармацыі, на 345-м км трасы кіроўца не ўлічыў варункі надвор'я і метэаралагічныя варункі, няправільна выбраў бяспечную хуткасць руху, дапусціў занос аўтамабіля, з'ехаўшы ў левы па ходзе руху кювет, і перакуліўся, - распавялі ў Дзяржаўтаінспекцыі.
Пацярпела 45-гадовая жанчына, пасажырка Volkswagen. Паведамляецца, што яна не была прышпіленая рэменем бяспекі.
У Гомельскай вобласці таксама выпаў снег. 17 лістапада ў Гомельскім раёне ў аварыю трапіў 46-гадовы кіроўца Toyota. Папярэдняя прычына таго, што адбылося - няправільна выбраная хуткасць, кіроўца не справіўся з кіраваннем. Аўтамабіль перакуліўся, мужчыну шпіталізавалі.
А ў Бабруйску, таксама не справіўшыся з кіраваннем, у дрэва рэзнуўся 25-гадовы кіроўца Volkswagen. У выніку ДТЗ пацярпеў 26-гадовы пасажыр аўто, з множнымі траўмамі ён шпіталізаваны.