Суд прыпыніў указ Трампа аб забароне на наданне прытулку нелегалам

Cуддзя паказаў, што прэзідэнт «не можа перапісваць іміграцыйнае заканадаўства».

Федэральны суддзя часова заблакаваў указ прэзідэнта Дональда Трампа, які забараняе надаваць прытулак імігрантам, якія нелегальна прыбылі ў краіну з Мексікі, паведамляе «Голас Амерыкі».

Гэтая пастанова стала чарговай судовай паразай Трампа ў справе, датычнай іміграцыйнай палітыкі.

Акруговы суддзя Джон Тайгар з Сан-Францыска выпусціў часовы забаронны судовы ордэр у дачыненні да новых правілаў надання прытулку.

Ордэр Тайгара ўваходзіць у дзеянне неадкладна, і дзейнічае ва ўсёй краіне прынамсі да 19 снежня, калі суддзя запланаваў правесці слуханні пра больш працяглую забарону.

Прадстаўнікі міністэрства юстыцыі ЗША не былі даступныя для каментара.

У сваёй пастанове Тайгар паказаў, што Кангрэс дакладна вызначыў, што імігранты могуць падаваць хадайніцтва аб прытулку па-за залежнасцю ад таго, як яны патрапілі ў краіну. Суддзя назваў новыя правілы «экстрэмальным адступленнем» ад папярэдняй практыкі.

«Якім бы ні было кола прэзідэнцкіх паўнамоцтваў, прэзідэнт не можа перапісваць іміграцыйнае заканадаўства, уводзячы ўмовы, якія Кангрэс яўным чынам забараніў», - заявіў Тайгар.

Тайгар быў прызначаны на пасаду акруговага суддзі прэзідэнтам Баракам Абамам.

Папярэднія пастановы Трампа ў дачыненні да іміграцыйнай палітыкі, уключаючы захады супраць так званых гарадоў-сховішчаў, таксама былі заблакаваныя судамі.

Пастанова, якая тычыцца надання прытулку, з'явілася ў той час, як тысячы жыхароў Цэнтральнай Амерыкі, уключаючы вялікую колькасць дзяцей, утварылі караваны, што падыходзяць да мяжы ЗША, каб уцячы ад гвалту і беднасці ў сваіх краінах. Некаторыя ўжо прыбылі ў мексіканскі горад Ціхуане на мяжы з Каліфорніяй.

Праваабарончыя арганізацыі сцвярджаюць, што імігрантаў прымушаюць некалькі дзён ці нават тыдняў чакаць на мяжы, перш чым яны могуць падаць прашэнне аб наданні прытулку. На адміністрацыю падалі ў суд за тое, што яна нібыта наўмысна запавольвае працэс апрацоўкі заяў на мяжы.