«Пра трамвай нам не цікава»: Менчукі бунтуюць супраць уладаў

Жыхары Серабранкі ўсталі на абарону сваёй маёмасці.

Жыхарам Серабранкі ўчора ўвечары прэзентавалі план развіцця раёна ў межах вуліц Ванеева - праспекта Ракасоўскага - Пляханава - Якубава - мяжа ландшафтна-рэкрэацыйнай зоны 158ЛР. Ім паказалі, дзе пройдуць чацвёртая лінія метро і новая трамвайная галінка, дзе з'явіцца новы бульвар, якія будынкі будуць рэканструяваныя, а дзе пабудаваныя новыя, піша tut.by.

Але людзей больш цікавіла іншае: калі горад плануе зносіць іх гаражы?

Грамадскае абмеркаванне магло скончыцца ўчора і не пачаўшыся - актавая зала школы №164 выявілася замалой і відавочна ўсіх не ўмяшчала: людзі тоўпіліся ў праходах, частка засталася ў калідоры. Аднак жыхары Серабранкі былі настроеныя рашуча і пераносіць сустрэчу ў больш зручнае памяшканне адмовіліся.

Прадстаўнік «Мінскграда» Міхаіл Друшчыц пачаў з самага цікавага: найбліжэйшымі гадамі вуліцай Ракасоўскага пачне хадзіць трамвай, а ўздоўж праспекта з'явіцца бульвар. Зялёныя зоны ўнутры раёна застануцца не кранутымі, некалькі плоскасных наземных аўтастаянак рэканструююць у падземныя.

Яшчэ ён распавёў, дзе горадабудаўнікі адвялі месца пад будаўніцтва аб'екта грамадскага харчавання хуткага абслугоўвання з паркінгам - пляцоўка пад гэты аб'ект размешчаная на скрыжаванні праспекта Ракасоўскага з 2-м Веласіпедным завулкам (№23 па ГП).

У планах таксама рэканструкцыя ФАК «Серабранка» з будаўніцтвам тэніснага цэнтра. Пасля 2020 года запланаваная рэканструкцыя школ з павелічэннем колькасці навучэнцаў.

Але, як выявілася, большасць прысутных цікавіліся толькі адной часткай ПДП раёна - адрэзкам у межах вуліц Ванеева і 2-га Веласіпеднага завулка. Там цяпер размешчаны масіў боксавых гаражоў. На іх месцы паводле ПДП запланаваная шматузроўневая аўтастаянка, гаражы ж пойдуць пад знос.

Таму самае галоўнае і шматкроць паўторанае пытанне з залы: «Калі будуць зносіць нашы гаражы?»

Высветлілася, што рэканструкцыя гаражнага масіву ўзаемазлучаная з планамі метрабудаўцаў - праз гэтыя гаражы будзе праходзіць чацвёртая лінія метро. А гэта значыць, што гаворка ідзе пра даволі аддаленую перспектыву.

- У адпаведнасці з генпланам прапануецца па створу другога транспартнага кальца пракласці кальцавую галінку метро, - патлумачыў Уладзімір Прышчэпаў, распрацоўшчык раздзела па транспарце «Мінскграда». - Будаўніцтва кальцавой лініі можа быць пачатае толькі пасля рэалізацыі трэцяй лініі «Курасоўшчына - Зялёны луг». Гэта значыць, пасля 2030 года, не раней.

Пасля таго, як прысутным некалькі разоў паўтарылі, што да пытання аб зносе іх гаражоў вернуцца не раней за 2030 год, у зале ўсе спакойна ўздыхнулі. Атрымаўшы патрэбную інфармацыю, многія пакінулі сход.

Засталіся тыя, што «хацелі б перадаць гараж у спадчыну» і не гатовыя згаджацца нават на вельмі аддаленыя перспектывы змяніць гараж на месца на шматузроўневай стаянцы.

Заключная частка мерапрыемства праходзіла ў выглядзе «гурткоў па інтарэсах» - людзі падыходзілі са сваімі пытаннямі да прысутных на абмеркаванні дэпутатаў, прадстаўнікоў адміністрацыі і спецыялістаў «Мінскграда». Спектр інтарэсаў - ад залягання «воднай лінзы» і як праз яе будаваць метро, ды «дзе захоўваць лыжы і бульбу» без гаража.

Сёй-той пытаўся і пра тое, дзе і якое жыллё і на месцы чаго яно будзе пабудаванае. Высветлілася, што шматпавярховыя жылыя дамы з'явяцца ўздоўж вуліцы Ванеева. Але спачатку трэба будзе вынесці прадпрыемства ЗАТ «Аўтакамбінат №3» і Беларускі рэспубліканскі саюз спажывецкіх таварыстваў.

Шматпавярховы дом з убудавана-прыбудаванымі аб'ектамі грамадскага прызначэння запланаваны на скрыжаванні праспекта Ракасоўскага і 2-га Веласіпеднага завулка.

Дадасца ў гэтым раёне і спартовых аб'ектаў - на скрыжаванні вуліцы Пляханава і праспекта Ракасоўскага будуць будаваць аб'ект спартовага прызначэння з падземнай аўтастаянкай.