Як «дармаедам» будуць паведамляць, што яны патрапілі ў базу

Пра гэта распавяла міністарка Касцевіч.

Доступ да базы звестак не занятых у эканоміцы грамадзян, якая цяпер карэктуецца і павінна быць адкрытая 1 снежня, зможа атрымаць кожны жыхар Беларусі. Пра гэта паведаміла міністарка працы і сацыяльнай абароны Ірына Касцевіч на семінары ў Віцебску. Беларусы змогуць атрымаць доступ да базы звестак не занятых у эканоміцы на Адзіным партале электронных паслуг, паведамляюць «Віцебскія весткі».

Паведамляецца, што мянушку і пароль для доступу на партал выдадуць у службе «адно акно». Гэтая паслуга, як стала вядома tut.by, будзе выконвацца бясплатна.

У Адзіным партале электронных паслуг паведамілі, што пакуль не маюць інфармацыі, ці могуць беларусы даведацца праз «адно акно», ці патрапілі ў базу не занятага ў эканоміцы насельніцтва. Пры гэтым нагадалі, што ў Беларусі для юрыдычных асоб увялі новую электронную паслугу - у онлайн-рэжыме перадаваць звесткі аб занятым у эканоміцы насельніцтве. Гэтая інфармацыя будзе выкарыстоўвацца для фармавання базы незанятага ў эканоміцы насельніцтва, якую Мінпрацы павінна стварыць да 1 снежня гэтага года. Новая электронная паслуга бясплатная, скарыстацца ёй могуць як дзяржорганы, так і іншыя арганізацыі, якія павінны падаваць звесткі аб занятых у эканоміцы.

Нагадаем, праграмны комплекс «Адно акно» быў распрацаваны і прэзентаваны яшчэ ў 2010 годзе. Ён укаранёны ў 79 раёнах рэспублікі, цяпер у сістэме працуе 2341 аператар.

Таксама паведамляецца, што цяпер прапрацоўваецца варыянт інфармавання беларусаў пра тое, што яны патрапілі ў базу незанятага ў эканоміцы насельніцтва і будуць плаціць за паслугі ЖКГ паводле100-адсоткавага тарыфу, праз рахункі.

Нагадаем, беларусам сталі рассылаць «лісты шчасця»: патэнцыйных дармаедаў просяць пацвердзіць занятасць.

Раней паведамлялася, што ўлады не маюць намер рассылаць лісты з апавяшчэннямі тым, хто трапіў у базу.

- Для гэтых мэт распрацоўваецца праграмнае забеспячэнне, якое выключае публічнае размяшчэнне персанальных звестак. Гэта дазволіць кожнаму ахвотнаму праверыць, ці належыць ён да незанятых у эканоміцы ці не. Старанна прадумваем пытанні абароны прыватнасці інфармацыі, каб доступ да яе мог атрымаць толькі сам грамадзянін. Лістоў з паведамленнем рассылаць не плануем. ГА «Менская гарадская жыллёвая гаспадарка» размесціць на паведамленнях аб аплаце ЖКП інфармацыю пра іх поўны кошт, - распавядала раней старшыня камітэта працы, занятасцi i сацыяльнай абароны Менгарвыканкама Жанна Рамановіч.

Нагадаем, што працоўныя за мяжой беларусы аўтаматычна трапляюць у «дармаеды». Складаць спісы будуць спецыяльныя камісіі, якія працуюць з асабовай інфармацыяй беларусаў.

Не раз заяўлялася аб тым, што «дармаеды» будуць аплачваць і іншыя паслугі, якія субсідуюцца дзяржавай, а «незанятых у эканоміцы беларусаў» палохалі ЛПП.

Нагадаем, што папярэдняя версія «дармаедскага дэкрэта» выклікала масавыя пратэсты, якія экспэрты называюць самымі маштабнымі ў Беларусі з часоў «перабудовы».