Данія спыніла экспарт зброі ў Савудаўскую Арабію
- 22.11.2018, 15:43
- 8,146
Пастанова была прынятая пасля кансультацый з іншымі міністрамі замежных спраў ЕЗ.
Данія прыпыняе выдачу дазволаў на экспарт зброі і вайсковай тэхнікі ў Савудаўскую Арабію ў сувязі з забойствам савудаўскага журналіста Джамаля Хашкаджы і сітуацыяй у Емене. Пра гэта заявіў кіраўнік МЗС краіны Андэрс Самуэльсэн, паведамляе Reuters.
Са слоў кіраўніка ўстановы, пастанова была прынятая пасля нядаўніх абмеркаванняў з іншымі міністрамі замежных спраў Еўрапейскага Звязу.
Ён таксама нагадаў, што Савудаўская Арабія з'яўляецца адным з найбуйнейшых імпарцёраў зброі ў свеце.
Узброены канфлікт у Емене трывае з сакавіка 2014 года. Паўстанцы-хусіты супрацьстаяць войскам выгнанага прэзідэнта Абд Рабо Мансура Хадзі, якога падтрымліваюць сілы кааліцыі на чале з Савудаўскай Арабіяй.
Хашкаджы знік 2 кастрычніка, пасля таго, як адправіўся ў генеральнае консульства Савудаўскай Арабіі ў Стамбуле для атрымання дакументаў пра развод. У консульстве першапачаткова заявілі, што Хашкаджы правёў там нядоўгі час, пасля чаго пакінуў установу.
16-га і 17 кастрычніка турэцкія праваахоўнікі правялі ператрус у консульстве. Паведамлялася, што падчас следчых дзеянняў выяўленыя "пэўныя довады", якія сведчаць, што там загінуў Хашкаджы.
20 кастрычніка пракурор Савудаўскай Арабіі заявіў, што журналіст быў забіты ў выніку бойкі з людзьмі, якіх ён сустрэў у консульстве. Паводле справы аб забойстве ў Савудаўскай Арабіі затрыманыя 18 чалавек.
21 кастрычніка міністр замежных спраў Савудаўскай Арабіі Адэль аль-Джубэйр заявіў, што агенты спецслужбаў "выйшлі за межы сваіх паўнамоцтваў", учыніўшы забойства журналіста і паспрабаваўшы гэта схаваць. Ён адмаўляў, што наследны прынц мог ведаць што-небудзь аб рыхтаванай ліквідацыі Хашкаджы.
27 кастрычніка Турцыя запатрабавала выдачы падазраваных, але Эр-Рыяд адмовіў.
31 кастрычніка Генеральная пракуратура Стамбула заявіла, што Хашкаджы стаў ахвярай спланаванага забойства, яго задушылі адразу пасля ўваходу ў будынак генеральнага консульства.
2 лістапада прэзідэнт Турцыі Раджэп Эрдаган заявіў, што забіць Хашкаджы загадалі "на самым высокім узроўні" ў Савудаўскай Арабіі.
Канцлерка Нямеччыны Ангела Мэркель заявіла, што ФРГ не будзе экспартаваць зброю ў Савудаўскую Арабію да таго часу, пакуль не высветліць усе факты аб забойстве Хашкаджы. Дэпутаты Еўрапарламенту заклікалі краіны ЕЗ увесці эмбарга на пастаўку зброі ў Эр-Рыяд.
Сэнатары ў ЗША падрыхтавалі законапраект аб прыпыненні паставак зброі ў Савудаўскую Арабію.