Лондан і Брусэль дамовіліся наконт праекту палітычнай заявы аб Brexit

Дакумент накіраваны для азнаямлення ўрадаў 27 дзяржаў ЕЗ.

Перамоўнікі Еўразвязу і Вялікабрытаніі дасягнулі дамоўленасцяў аб праекце палітычнай заявы аб стасунках Лондана і Брусэля пасля брэксіту. Як патлумачыў у чацвер, 22 лістапада, старшыня Еўрапейскай рады Дональд Туск, ён накіраваў дакумент для азнаямлення ўрадаў 27 дзяржаў ЕЗ, паведамляе dw.com.

У Еўракамісіі ўдакладнілі, што тэкст "ужо ўсебакова ўзгоднены на палітычным узроўні". Цяпер ён можа быць вынесены на галасаванне кіраўнікоў дзяржаў і ўрадаў краін Еўразвязу на пазачарговым саміце 25 лістапада.

У сваю чаргу канцлерка ФРГ Ангела Мэркель (Angela Merkel) выказала ўпэўненасць, што дадатковая асцярога ўсё яшчэ патрабуецца, найперш у самой Вялікабрытаніі. "Я прыкладу ўсе намаганні, каб у нас было пагадненне", - дадала яна.

Статус Гібралтару як камень спатыкання

Раней Мэркель з надзеяй выказалася пра тое, што 27 дзяржаў-чальцоў ЕЗ ухваляць пагадненне Брусэля і Лондана аб выхадзе Вялікабрытаніі з Еўразвязу, нягледзячы на няпросты працэс перамоў.

Пры гэтым нямецкая канцлерка не ўдакладніла, як можа быць урэгуляваная сітуацыя вакол статусу Гібралтара - заморскай тэрыторыі Вялікабрытаніі, аспрэчанай Мадрыдам, аднак выказала надзею, што праблема будзе разгледжаная да нядзелі.

Вялікабрытанія павінна пакінуць ЕЗ 29 сакавіка 2019 года. Са слоў Тэрэзы Мэй, пагадненне з Брусэлем гатова на 95 адсоткаў. Радыкальныя прыхільнікі брэксіта намагаюць на бескампрамісным і хуткім "разводзе" з Еўразвязам.

Фінальны праект пагаднення яшчэ павінен разгледзець парламент Вялікабрытаніі. Калі ён падтрымае прыняцце дакумента, то выніковае галасаванне па ім адбудзецца ў снежні гэтага года.