«Мы не можам ні засяліцца ў дамы, ні трапіць на свае ўчасткі»

Жыхары Баранавічаў змагаюцца з чыноўнікамі за вадаправод, дарогі і электрычнасць.

Гараджане, што некалькі гадоў назад атрымалі ўчасткі ў новым мікрараёне Баранавічаў Дубава-4 і пабудавалі там дамы, не могуць засяліцца ў іх праз адсутнасць камунікацый, піша intex-press.by.

Барацьба за вадаправод, дарогі і электрычнасць доўжыцца ўжо некалькі месяцаў. Мяркуючы з адказаў чыноўнікаў, чакаць гэтых выгод давядзецца яшчэ доўга.

Пра ўладальнікаў участкаў у Дубова-4 СМІ распавядалі ў верасні. Людзі, якія гадамі стаялі ў чарзе на жыллё, і нарэшце атрымаўшы ўчасткі пад будаўніцтва ў новым мікрараёне горада, скардзіліся на тое, што праз адсутнасць вады, электрычнасці і нармальных дарог яны не могуць засяліцца ў сваё жыллё, а некаторыя не ў стане нават пачаць будаўніцтва.

Участкі ў Дубава-4 пачалі раздаваць у 2014 годзе, але цяпер электрычнасць у мікрараёне падведзеная толькі да часткі дамоў, пабудавана ўсяго некалькі гравійных дарог. Вады ў мікрараёне няма.

У кастрычніку актыўныя ўладальнікі ўчасткаў пабывалі на выязным прыёме ў старшыні Берасцейскага аблвыканкама Анатоля Ліса ў горадзе. Людзі распавялі пра сваю праблему, і кіраўнік вобласці запатрабаваў ад мясцовых уладаў, нягледзячы ні на што, знайсці грошы і развязаць пытанне па Дубава-4.

- Так рабіць нельга. У вас жа ёсць дакументацыя. Вы людзям выдаяце ўчасткі, людзі разлічваюць, што, пакуль яны пабудуюць дом, у іх будзе інфраструктура. А вы кажаце, што няма грошай. Значыць, здымайце грошы, раз вы выдавалі людзям участкі і яны пабудавалі скрынкі, - сказаў Анатоль Ліс.

Не ўсім, і толькі пры ўмове фінансавання

Пасля сустрэчы, распавядаюць уладальнікі ўчасткаў, у Дубава-4 з'явілася тэхніка. Будаўнікі выраўнялі велізарны насып, які быў каля ўчасткаў, пачалі раўняць некаторыя дарогі. Але працы вядуцца толькі ў частцы мікрараёна.

- А да астатніх участкаў нават пад'ехаць немагчыма. Як толькі дажджы - суцэльны бруд, балота, - распавядае ўладальніца аднаго з дамоў.

Але калі з дарогамі людзі гатовыя пачакаць, то без вады і электрычнасці яны не могуць ні здаць свае дамы ў эксплуатацыю, ні засяліцца ў іх. І, мяркуючы па адказах чыноўнікаў, чакаць гэтых камунікацый давядзецца яшчэ доўга.

У лісце з Баранавіцкага гарвыканкама, які ўладальнікі ўчасткаў атрымалі пасля прыёму ў Анатоля Ліса, гаворыцца, што будаўніцтва сетак электразабеспячэння на некаторых вуліцах у Дубава-4 запланавана завяршыць у другім квартале 2019 года, але ў гэты пералік патрапілі далёка не ўсе вуліцы з ужо пабудаванымі дамамі.

Пачатак будаўніцтва сетак водазабеспячэння ў Дубава-4 запланаваны на красавік 2019 года з уводам у эксплуатацыю ў трэцім квартале 2020 года. І ў планах таксама не ўсе вуліцы.

Мала таго, у лісце гаворыцца, што і электрычнасць, і ваду правядуць пры ўмове дастатковага фінансавання.

- Мы ўжо змірыліся з тым, што газ, каналізацыю нам давядзецца пракладаць самім, за ўласныя грошы. Але нават тых мінімальных камунікацый, якія павінна забяспечыць дзяржава - вада і электрычнасць, ніяк не дачакаемся. Калі б ведалі, што так будзе, не згаджаліся б на ўчасткі ў гэтым новым мікрараёне. За столькі гадоў даўно б ужо кватэру пабудавалі і жылі спакойна - з вадой, святлом і нармальнымі дарогамі, - кажа гаспадыня аднаго з участкаў.