52 пашкоджанні «Адмірала Кузняцова»

У РФ ацанілі шкоду «Адміралу Кузняцову» пасля аварыі з плывучым докам.

Ліквідацыя пашкоджанняў, якія авіяносны крэйсер «Адмірал Кузняцоў» атрымаў у выніку надзвычайнага здарэння з плывучым докам 30 кастрычніка, абыдзецца прыкладна ў 70 млн руб. Пра гэта заявіў кіраўнік Аб'яднанай суднабудаўнічай карпарацыі (АСК) Аляксей Рахманаў, паведамляе РБК.

«Камісія налічыла 52 пашкоджанні», - адзначыў ён. Са слоў Рахманова, сума выдаткаў на рамонт у рамках бюджэту мадэрнізацыі «Адмірала Кузняцова» дазваляе казаць пра «малаважныя пашкоджанні».

Аварыя з плывучым докам ПД-50 адбылася ўначы 30 кастрычніка на 82-м суднарамонтным заводзе, які належыць «Раснафце», у пасёлку Расляково Мурманскай вобласці. За дзень дагэтуль у доку завяршыўся рамонт авіяносца. Аварыя адбылася пры выхадзе карабля з ПД-50: «Адбыўся скачок напругі з берага, праз гэта сталі помпы і адбылося апусканне дока ў ваду», - казалі РБК на заводзе «Звездочка» (галоўнае прадпрыемства мадэрнізацыі авіяносца).

Падчас адключэння помпаў не былі запушчаныя рэзервовыя генератары, таму ўтрымаць ПД-50 на паверхні не ўдалося. У выніку «Кузняцоў» проста выйшаў з дока, атрымаўшы нязначныя пашкоджанні, як адразу заяўлялі ў АСК: на палубу авіяносца абрынуўся 70-тонны вежавы кран. У выніку здарэння загінуў адзін чалавек, чацвёра атрымалі траўмы і былі шпіталізаваныя. Пасля аварыі Следчы камітэт пачаў крымінальную справу паводле ч. 2 арт. 216 КК (парушэнне правілаў бяспекі пры вядзенні будаўнічых работ, што пацягнула праз неасцярожнасць смерць чалавека)

Авіяносец пасля аварыі адбуксіравалі да прычала 35-га сударамонтнага завода для працягу прац. Лёс ПД-50 пакуль невядомы. Яго будуць падымаць, бо праз яго парушаны доступ у завадскую гавань, «іншае пытанне - якім спосабам і ў які перыяд», казаў кіраўнік Мінпрамгандля РФ Дзяніс Мантураў.

Агулам рамонт і мадэрнізацыя «Кузняцова» абыдзецца расейскай дзяржаве ў 40 млрд руб.