У Менску пройдзе фэст польскіх фільмаў «Вісла»

Фільмы будуць паказаны ў сталічным кінатэатры «Цэнтральны».

Фэст польскіх фільмаў «Вісла», у праграме якой стужкі апошніх гадоў, якія скарылі сэрцы польскай і міжнароднай аўдыторыі на многіх кінафестывалях, а таксама ў кінапракаце, пройдзе 5 -9 снежня ў Менску. Пра гэта распавялі БелТА ў пасольстве Польшчы ў Беларусі.

Падрыхтаваны разнастайны жанравы рэпертуар, у якім ёсць камедыі, драмы, а таксама кіно для сямейнага прагляду. На афіцыйным адкрыцці гледачы ўбачаць фільм «Найлепшы ад усіх» Лукаша Палькоўскага.

Гэта займальная гісторыя аб подзвігу, эфектным падзенні і незвычайнай сіле характару, гісторыя, заснаваная на рэальных падзеях з жыцця Ежы Гурскага, які прабег дыстанцыю чэмпіянату свету ў трыятлоне, устанавіўшы пры гэтым новы сусветны рэкорд. Гэта дасягненне было б немагчымым, калі б не падзеі з ягонага асабістага жыцця, дзякуючы якім ён цалкам змяніў свой лёс.

Лёгкая рамантычная камедыя «Планета сінглаў» Міці Акарна - фільм пра каханне ў ХХІ стагоддзі. Ганна - чароўная, але пры гэтым не вельмі ўпэўненая ў сабе настаўніца музыкі, кідаецца ў пошуках ідэальнага мужчыны ў Інтэрнэце на сайтах знаёмстваў. Выпадкова, у вечар Святога Валянціна, яна сустракае ў рэстарацыі Томка, вядучага самага папулярнага і скандальнага ТВ-шоў у краіне. Ці прывядзе гэтая сустрэча да радыкальных змен у жыцці герояў, гледачы змогуць даведацца, прыйшоўшы на паказ фільма.

Стужка "Жаданне жыць" Мацея Пепшыцы распавядае пра барацьбу з непераадольнымі абставінамі. Гэта кранальная, поўная аптымізму і гумару, гісторыя Матэвуша, які пакутуе на дзіцячы цэрэбральны параліч. Нягледзячы на праблемы ў кантактах з навакольным светам і перашкоды лёсу, хлопчык не страчвае сілу волі і радасці жыцця.

Закрывае фэст фільм для сямейнага прагляду «За сінімі дзвярыма» Марыюша Палея. Стужка захапляе гледачоў у незвычайнае падарожжа, у свет, дзе можна знайсці ўсё, што любяць дзеці: цікавых герояў, загадкавых пачвараў і новых сяброў у выглядзе чароўных, маляўнічых птушак.

Усе фільмы будуць паказаны ў сталічным кінатэатры «Цэнтральны», уваход 6-9 снежня свабодны.