Лукашэнка: Мы з расейцамі адкажам на размяшчэнне амерыканскай базы ў Польшчы

Дыктатар другім разам за тыдзень пракаментаваў пастанову Польшчы аб размяшчэнні амерыканскай вайсковай базы.

- Я міністру замежных спраў сказаў - ён выступаў у нас у Менску: мы з вамі ваяваць не збіраемся. Таму не трэба ствараць лішнія базы. У адваротным выпадку мы з расейцамі павінны будзем адказваць. Значыць, мы будзем вымушаныя нешта размяшчаць, каб вам процідзейнічаць, - заявіў Лукашэнка падчас сустрэчы з жыхарамі гарадскога пасёлка Балбасава ў Аршанскім раёне, паведамляе прэс-служба Лукашэнкі.

На гэтым тыдні ў Менску адбылася Мюнхенская канферэнцыя ў бяспецы. Аляксандр Лукашэнка ўжо каментаваў жаданне Польшчы ў стварэнні на сваёй тэрыторыі «Форта Трампа».

- Мы не ідыёты і, вядома, на гэта рэагуем, з нашым галоўным хаўруснікам думаем, як супрацьстаяць усяму гэтаму і знайсці адэкватны адказ у гэтай сітуацыі. Мы не такія багатыя з Расеяй, але мы, вядома, пра гэта думаем, хоць не хацелася б, нам ёсць на што траціць грошы. А Трамп наўрад ці думае пра тое, што ёсць такая маленькая Беларусь, што тут людзі жывуць. Я быў прыхільнікам Трампа, але цяпер мне здаецца, што гэта ўсё гульня. Але такія размовы пра ядзерную зброю, пра размахванне ракетамі шкодныя, а Дональд гэтага як малады палітык не разумее, - сказаў Лукашэнка.

Падчас нядаўніх перамоваў з Дональдам Трампам польскі лідар Анджэй Дуда заявіў пра гатоўнасць выдачы больш чым 2 млрд даляраў на падрыхтоўку і будаўніцтва сталай вайсковай базы ЗША на тэрыторыі Польшчы пад назвай «Форт Трампа». Гаспадар Белага дома ў сваю чаргу заявіў, што прапанова Дуды «ўсё больш разглядаецца».