Картэж з прэм'ер-міністрамі Бельгіі ды Вялікай Брытаніі трапіў у ДТЗ
2- 9.11.2018, 17:06
- 10,685
Пацярпелі два матацыклісты дарожнай паліцыі.
Раніцай 9 лістапада на аўтатрасе ў Бельгіі ўдзельнікамі ДТЗ сталі паліцыянты, якія суправаджалі прэм'ер-міністраў Бельгіі і Вялікай Брытаніі Чарльза Мішэля і Тэрэзу Мэй. Пра гэта паведамляе «Гордон» са спасылкай на DH.be.
Кіраўнікі ўрадаў дзвюх краін накіроўваліся на вайсковыя могілкі Сен-Сімфар’ен у рамках мерапрыемстваў, прысвечаных 100-годдзю заканчэння Першай сусветнай вайны.
Паводле звестак выдання, два матацыклісты дарожнай паліцыі, якія суправаджалі картэж, не паспелі адрэагаваць на запаволенне аўтамабіля наперадзе і рэзнуліся ў яго. Абодва паліцыянты ўпалі на дарогу.
Мішэль загадаў суправаджэнню спыніцца. Сведкі сцвярджаюць, што прэм'ер-міністр Бельгіі апусціўся на калені каля пацярпелых.
Паліцыянтаў шпіталізавалі. DH.be адзначае, што «іхны стан не выклікае турботы».